Hy mag dalk in Julie sy 43ste verjaardag vier, maar Roland Schoeman het sy naam in die hoed by die Suid-Afrikaanse Swemkampioenskap in Gqeberha gegooi.
Die swemmer wat al goud, silwer en brons by die Olimpiese Spele gesmaak het, sal nou by die wegspringblok in die 50 m- en 100 m-vryslagitem aantree, terwyl hy ook sal probeer om sy stempel in die 50 m-vlinderslagitem af te druk.
Schoeman was uiteindelik by vier agtereenvolgende Spele (2000, 2004, 2008 en 2012) in aksie, terwyl hy ook met ’n rits Suid-Afrikaanse én ’n paar wêreldrekords gespog het.
Nodeloos om te sê sal sy teenwoordigheid in Gqeberha vir ʼn bietjie bykomende woema sorg en Chad le Clos sien uit na sy deelname.
“Ek dink dit gaan opwindend wees. Dit is baie goed dat Roland terug is; dit is eintlik ongelooflik dat hy nog deelneem en ek dink hy gaan homself goed van sy taak kwyt,” het Le Clos gesê.
Three-time Olympic medallist Roland Schoeman’s name is among those on the start lists for the SA National Championships in Gqeberha this week – the 42-year-old sprinter looking to take on the young guns at the 12-16 April meet.https://t.co/jCXeTqxhsx
— Team South Africa (@TeamSA2024) April 10, 2023
Natuurlik sal die kollig ook op Pieter Coetzé en Lara van Niekerk val.
Dié twee jong swemsterre het verlede jaar amok by die Statebondspele in Birmingham gemaak en hulle is onlangs as Suid-Afrika se sportman en -vrou van die jaar aangewys.
“Dit sal wonderlik wees om die nasionale titel in te oes, maar ek wil eerder op my resiesstrategie konsentreer en dit na die beste van my vermoë uitvoer,” het Van Niekerk gesê.
Dan sal Coetzé in ses items sy slag wil wys.
Hy sal onder meer in ’n spul rugslagitems (50 m, 100 m en 200 m) in aksie wees, terwyl hy ook sy stempel in die vryslag (50 m en 100 m) en vlinderslag (50 m) wil afdruk.
Die nasionale kampioenskap word van 12 tot 16 April beslis.
Van Schoeman se prestasies:
- Langbadrekords:
50 m-vryslag: 21.67 s in Beijing 2008 en weer in Barcelona 2013 (nasionale rekord)
100 m-vryslag: 48.17 s in Athene 2004 (vorige SA rekord)
50 m-vlinderslag: 22.90 s in Rome 2009 (vorige wêreldrekord)
4×100 m-vryslag: 3:11.93 min in Rome 2009 (vorige wêreldrekord)
- Kortbadrekords:
50 m-vryslag: 20.30 s in Pietermaritzburg 2009 (vorige wêreldrekord)
100 m-vryslag: 46.25 s in Berlyn 2005 (vorige wêreldrekord)
100 m individuele wisselslag: 52.20 s in Hamburg 2006 (vorige wêreldrekord)
Vryslag? Wat is kruipslag dan?