Vreesbevange toeskouers by die Meesterstoernooi op Augusta in die VSA het in alle rigtings laat spat nadat drie reusedennebome Vrydag naby hulle op die wêreldbekende baan in stormweer ontwortel is.
Die voorval het naby die 17de putjie plaasgevind kort voordat die tweede ronde weens stormweer opgeskort is.
Die bome het naby ʼn groep toeskouers geval, maar volgens die organiseerders is niemand beseer nie.
“Die veiligheid en welstand van almal by die Meesterstoernooi sal altyd die klub se grootste prioriteit wees. Ons sal die weer vandag en regdeur die toernooi fyn dophou,” het die klub in ʼn verklaring gesê.
Crazy, scary site at Augusta National. Great to hear everyone is ok. #Masters#themasters #AugustaNational pic.twitter.com/Mtf0w6GNfJ
— Paul (@ticatsroar) April 7, 2023
Kort nadat die bome omgeslaan het, het die organiseerders aangekondig dat spel opgeskort word en toeskouers moes die baan verlaat wat deur stormwind getref is. ʼn Aankondiging het in daardie stadium gelui dat donderstorms, gepaardgaande met sterk wind en weerlig, onderweg is na die gebied.
Die toringhoë dennebome is ʼn kenmerk van die welbekende en prentjiemooi baan.
More from the scary scene at Augusta National's 17th tee. pic.twitter.com/DJFTjwRP4c
— Golf Digest (@GolfDigest) April 7, 2023