Jonty Rhodes en Johan Botha vier ’n paaltjie. Foto: Twitter.
Die 40-jarige Johan Botha het gister die horlosie in Kanpur teruggedraai toe hy vier Nieu-Seelandse kolwers terug na die kleedkamer gestuur het.
Die draaier se vernuf – saam met Andrew Puttick se flitsende kolf – het toegesien dat Suid-Afrika se krieketlegendes vir die Kiwi’s met nege paaltjies in die Road Safety-wêreldreeks geklop het.
Benewens Botha en Puttick kan die Suid-Afrikaners ook op die vaardighede van Jonty Rhodes, Henry Davids, Jacques Rudolph en Morné van Wyk steun.
Die 53-jarige Rhodes het juis vroeër in die reeks 38 onoorwonne lopies vanaf 27 aflewerings teen Indië gemoker.
Ná hul twee wedstryde is die Suid-Afrikaners tans vierde op die punteleer. Hulle speel weer Saterdag teen Sri Lanka.
- Opsomming van telkaart:
Nieu-Seeland 99/8 in 20 boulbeurte: Dean Brownlie 48, Johan Botha 4/11 en Thandi Tshabalala 3/9.
Suid-Afrika 100/1 in 13.3 boulbeurte: Andrew Puttick 51* en Alviro Petersen 29*.
- Spanne:
Suid-Afrika: Morné van Wyk, Andrew Puttick, Alviro Petersen, Jacques Rudolph, Jonty Rhodes (kaptein), Henry Davids, Johan van der Wath, Eddie Leie, Garnett Kruger, Johan Botha en Thandi Tshabalala.
Nieu-Seeland: Aaron Redmond, Anton Devcich, Dean Brownlie, Ross Taylor (kaptein), Neil Broom, Jacob Oram, Craig McMillan, Gareth Hopkins, Bruce Martin en Shane Bond.
- Bepalings:
17 September: Suid-Afrika teen Sri Lanka
19 September: Suid-Afrika teen Engeland
23 September: Suid-Afrika teen Australië
A 76-run unbeaten partnership between Andrew Puttick and Alviro Petersen puts @SAfrica_legends in the winner's seat as the Protea Legends open their account on the points table with a 9-wicket win.#NZLvsSAL #RoadSafetyWorldSeries #RSWS #YehJungHaiLegendary pic.twitter.com/lsPD7c6aJi
— Road Safety World Series (@RSWorldSeries) September 12, 2022
