Jonk ofte not; Dewald Brevis is ʼn baie spesiale krieketspeler wat oor die unieke gawe beskik om ʼn mens vir ʼn rukkie van jou sorge te laat vergeet.
Met elke swaai van sy kolf het sportliefhebbers ʼn bietjie meer hoop vir die kriekettoekoms gekry en selfs die nuus van fase 6-beurtkrag het ʼn bietjie van sy gewone slaankrag verloor.
Die 19-jarige kolwer het toe inderdaad vlamgevat in die eerste wedstryd van die SA20-toernooi en hy het 70 onoorwonne lopies vanaf 41 balle vir MI Cape Town teen Paarl Royals gemoker.
Hy het die Nuweland-skare met vyf reuse-sesse vermaak en toegesien dat die tuisspan die kragmeting binne 16 boulbeurte en met agt paaltjies gewen het.
Boonop het hy ook met volwassenheid gespeel.
Die toeskouers – asook Kevin Pietersen in die kommentatorshokkie – het hom aangemoedig om die wedstryd met nóg ʼn ses te beklink.
Hoewel die versoeking waarskynlik groot was, het hy kalm gebly en vir ʼn enkellopie deurgeskarrel. ʼn Beïndrukte Pietersen het steeds gesê dat dit een van die beste oomblikke van die wedstryd was.
Nodeloos om te sê is hy as die speler van die wedstryd aangewys en hy het summier die toeskouers vir hul ondersteuning bedank.
“Ek het elke liewe oomblik geniet en ek is dankbaar vir hierdie geleentheid om voor my tuisskare te speel,” het Brevis gesê.
Ryan Rickelton – die kolwer wat dalk (beslis?) saam met die Proteas na Australië moes reis – het ook goed gelyk.
Hy het 42 blitsige lopies aangeteken en ʼn openingsvennootskap van 90 lopies binne 11 boulbeurte saam met Brevis geniet.
Vroeër het Engeland se Jofra Archer met sy blitsige boulwerk geskitter, terwyl Jos Buttler en David Miller ook goed gekolf het.
- Opsomming van telkaart:
Paarl Royals 142/7 in 20 boulbeurte: Jos Buttler 51, David Miller 42 en Jofra Archer 3/27.
MI Cape Town 143/2 ná 15,3 boulbeurte: Dewald Brevis 70, Ryan Rickelton 42 en Ramon Simmonds 1//32.
The Newlands crowd was thoroughly entertained by Dewald Brevis ????#MICTvPR #Betway #SA20 | @Betway_India pic.twitter.com/f546OVExOW
— SA20_League (@SA20_League) January 10, 2023
O wee, ek hoop die keurders neem kennis. die ou gesegde sê ” if your good enough, your old enough” Of is sy velkleur verkeerd?