Die Blitsbokke is die verdedigende seweskampioen in Dubai nadat hulle Ierland verlede jaar met 21 – 5 in die bekereindstryd geklop het.
Maar dinge het daarna lelik begin skeefloop en die Suid-Afrikaners kon net 12 van hul laaste 30 kragmetings in die HSBC-sewesreeks wen.
Die Blitsbokke speel Saterdag in hul eerste wedstryd van die nuwe seisoen in die einste woestynstad en die spelers is oorgehaal om vir die geploeter van vroeër te vergoed.
“Vir ʼn speler is dit baie spesiaal om die Blitsbok-trui oor die kop te trek, maar verlede seisoen was ons spel glad nie op standaard nie. Dit het seergemaak en ons is vasberade om beter te speel,” het Impi Visser gesê.
Die ervare Blitsbok is een van 13 nasionale spelers wat vir die Dubai-toernooi gekies is.
“Die groep het goeie herinneringe van die toernooi en dit sal my sewende keer in Dubai wees. Baie van die spelers het hul buiging hier gemaak en ons het nou juis weer oefentruie aan Quewin Nortjé en Katlego Letebele oorhandig.”
Dié twee spelers kan hul internasionale buiging dié naweek maak.
Volgens Visser het die Blitsbokke baie hard in aanloop tot die toernooi gewerk.
“Ons het onsself tot die uiterste op die oefenveld getoets. Dit is egter nou verby en nou moet ons op die speelveld sterk staan. Die spelers is beslis oorgehaal om dit te doen.”
Blitsbok-groep vir Dubai: Christie Grobbelaar, Ryan Oosthuizen, Impi Visser, Zain Davids, Katlego Letebele, Masande Mtshali, Ronald Brown, Selvyn Davids, Dewald Human, Justin Geduld, Shilton van Wyk, Rosko Specman en Quewin Nortjé.
Bepalings:
Saterdag:
8:50: Suid-Afrika teen Samoa
12:58: Suid-Afrika teen Kanada
18:44: Suid-Afrika teen Nieu-Seeland
Uitslae van die Blitsbokke se vorige sewestoernooi in Dubai:
5 – 14 teen Groot-Brittanje
27 – 12 teen Kenia
19 – 12 teen Australië
24 – 19 teen Samoa (beker-kwarteindstryd)
26 – 19 teen Nieu-Seeland (beker-halfeindstryd)
21 – 5 teen Ierland (beker-eindstryd).