Antoine Dupont het weliswaar nie veel tyd op die speelveld in sy eerste wedstryd vir Frankryk se sewesrugbyspan gekry nie, maar kaptein Paulin Riva is opgewonde oor die talismanspeler se blitsrugbytoekoms.
Veral met die Olimpiese Spele om die draai in Parys.
Die persoon in beheer van die mikrofoon daar by die HSBC-sewesaksie in Vancouver het ook nie geskroom om die heuningkwas uit te haal toe Dupont sy verskyning in die tweede helfte van Frankryk se kragmeting teen die VSA gemaak het nie.
“Verwelkom asseblief een van die bestes nóg en die wêreld se voorste speler, Antoine Dupont, op die sewesveld,” het dit deur die luidsprekers weergalm terwyl die ondersteuners lekker saamgesels het.
Frankryk het die kragmeting met 24 – 12 beklink en Dupont het sy eerste tree na moontlike Olimpiese glorie gegee.
“Antoine is ʼn uitstekende speler en dit is vir ons baie belangrik om hom op die sewesveld by te staan. Hy is die beste ter wêreld en dit is ʼn voorreg om saam met hom te speel,” het Riva gesê.
Barely a sneak peek for Antoine Dupont’s debut, only introduced for the last three minutes but France kick off with a win in Vancouver
Dupont had one important clearout and used the pitch well to defend a Perry Baker break
Hopefully a lot more to come!
— Paul Eddison (@pauleddison) February 23, 2024
Volgens Dupont is hy oorgehaal om sy Olimpiese medaljedrome te verwesenlik.
“Vir die meeste sportliefhebbers is die Olimpiese Spele ʼn amper mitiese gebeurtenis. Dit beloof om ʼn groot partytjie in Frankryk te wees.”
Natuurlik beteken sy sewesdeelname dat hy Frankryk se Sesnasies-veldtog misloop.
“Wanneer ʼn mens in een kompetisie verloor, wil jy iets anders doen om weer te wen,” het Dupont in ʼn onderhoud met die BBC gesê.
Hy verwys natuurlik hier na Frankryk se Wêreldbeker-teleurstelling nadat die Springbokke die Hane met 29 – 28 in die kwarteindstryd op die Stade de France geklop het.
Tog weet hy dat sy sewespad nie noodwendig ʼn maklike een gaan wees nie.
“Ek dink die laaste keer wat ek sewesrugby gespeel het, was op o. 18-vlak. Tog is dit steeds rugby en daar is baie ooreenkomste [met die vyftienmanweergawe]. Ek sal moet hard werk om mededingende spel in al die kompetisies op te dis.”
- Frankryk het ook vir Samoa met 40 – 7 op die eerste dag van die Vancouver-toernooi geklop.