Manie Libbok is gereed om ’n verskil in sy 50ste wedstryd vir die Stormers te maak. (Foto: Hansie Linde)
ʼn Vyftigste wedstryd wink Saterdag vir Manie Libbok in Parys wanneer die Kapenaars met Stade Francais in ʼn Kampioenebeker-wedstryd kragte meet.
Die 26-jarige losskakel het reeds sy stempel op die jongste weergawe van die toernooi afgedruk; soos wat sy komkommerkoel strafskoppoging teen La Rochelle en die stewige vertoning teen die Sale Sharks getuig.
Nou is hy oorgehaal om nog ʼn kolligvertoning in die “Stad van lig” te lewer; die plek waar die Springbokke nie te lank gelede nie die Webb Ellis-trofee vir die vierde keer omhoog gehou het.
Warm gaan dit beslis nie wees nie: Volgens die weerprofete kan die kwik tot -2 °C daal.
“Ja, dit is natuurlik ʼn uitdaging om in die koue te speel en dit is beslis iets om aan gewoond te raak. Ek dink wel dit was -4 °C toe ons verlede jaar teen Clermont gespeel het. Ons het toe beslis waardevolle lesse geleer,” het Libbok gesê.
“Dit is lekker om terug in Parys te wees. Ek weet ons speel nie in dieselfde stadion [as tydens die Bokke se Wêreldbeker-triomf nie], maar ek sien daarna uit om weer hier in aksie te wees; veral teen ʼn goeie Franse klubspan.”
Die Stormers wen deesdae nie sommer ʼn rugbywedstryd in Europa nie en die Springbok-losskakel is oorgehaal om sy beste vir die span te lewer.
Libbok se aanvallende vaardighede pas die Kapenaars se spelpatroon soos ʼn handskoen en saam met Leolin Zas en Damian Willemse laat die span gereeld sy teenstanders na boegoebrandewyn gryp.
Hulle moet egter nou ʼn stewige vertoning in ʼn koue Parys opdis.
“Ons wil niks in die tenk oorlaat nie. Ek glo in hierdie groep spelers en ons volle aandag is op die komende wedstryd. As ons die klein dingetjies op die veld reg doen, glo ek dat die uitslag ook in ons guns sal wees.”
Manie Libbok is set for his 50th DHL Stormers cap this weekend ✨
We've been treated to some magical moments from the mercurial flyhalf so far ???? pic.twitter.com/J2KlnhOgIP
— SuperSport Rugby (@SSRugby) January 17, 2024
- Bepalings:
Kampioenebeker:
Saterdag:
15:00: Bulls teen Bordeaux op Loftus Versfeld
19:30: Stade Francais teen Stormers op die Stade Jean-Bouin
Europese Uitdaagbeker:
Saterdag:
17:15: Oyonnax teen Cheetahs
Sondag:
15:00: Lions teen Ospreys
19:30: Dragons teen Sharks
