Die afgelope jaar het Hollywood se bekendes hul deftige aandrokke in hul sitkamers gedra om virtueel toekennings te aanvaar – van hulle het dit selfs in hul slaapklere gedoen van die huis af! Maar Sondag was dit verfrissend om weer ʼn behoorlike rooi tapyt by die Oscar-toekennings te kon aanskou.
Die mans en die vroue het vanjaar die vere reg geskud en die eerste groot mode-geleentheid sedert die begin van die koronavirus-pandemie gevier.
Hier is ʼn paar uitblinkers op vanjaar se Oscar-tapyt:
Vuurwarm mans
Leslie Odom Jr. is vir twee Oscars genomineer – een vir beste ondersteunende akteur en nog een vir beste oorspronklike lied vir One Night in Miami. Hy het presies soos die bekende Oscar-beeldjie gelyk in sy skitterende goue Brioni-pak.
Colman Domingo het die oog getref in ʼn pienk van kop-tot-tone-uitrusting.
Paul Raci het ʼn swart pak gedra met in-die-kol-bykomstighede van silwer juwele en donker naellak.
Goue vroue
Carey Mulligan, wat vir beste aktrise genomineer is, het geskitter in ʼn moulose goue aandrok, ʼn kaal middel en lang sleep.
Die sangeres Andra Day het ook by die Oscar-tema gehou en ʼn goue rok met uitknipwerk en ʼn hemelhoë spleet gedra.
Pragtig in wit
Viola Davis, wat vir beste aktrise genomineer was, het ʼn wit, moulose Alexander McQueen-aandrok gedra met sexy uitknipwerk aan die bostuk.
Waag met kleur
Halle Berry, wat ʼn aanbieder by vanjaar se Oscars was, het met haar nuwe kort haarkapsel aandag getrek in ʼn vloeiende pers Dolce & Gabbana-rok.
Regina King het pragtig gelyk in ʼn blou Louis Vuitton-aandrok met gestruktureerde vlindermoue en blink silwer detail.
Angela Bassett het asems weggeslaan met ʼn helderrooi Alberta Ferretti-rok met pofmoue, ʼn spleet en ʼn massiewe strik agter.