Sonskynkus nuwe speelgrond vir ‘Survivor SA’

Nico Panagio is terug as aanbieder van ‘Survivor SA’. (Foto: Verskaf)

Twintig deelnemers van vorige seisoene van Survivor SA gaan in dié reeks se jongste aflewering ʼn tweede kans kry om vir die R1 miljoen-prysgeld mee te ding.

Survivor South Africa: Return of the Outcasts is van 18 Julie op M-Net (kanaal 101 op DStv) te sien en aanhangers sal met vier episodes per week bederf word.

Die negende seisoen van die trefferreeks word vanjaar ook wéér plaaslik verfilm nadat die agtste seisoen, Survivor SA: Immunity Island, aan die Wildekus in die Oos-Kaap afgespeel het.

Vanjaar is die Oos-Kaapse Sonskynkus die speelgrond vir ʼn seisoen wat beskryf word as “die warmste seisoen nóg”.

A day after I asked, @MNet (@DStv 101) says the 9th season of #SurvivorSA @Survivor_SA :Return of the Outcasts will start on 18 July and will have 4 episodes per week. 20 castaways are again trying to outlast each other in the Eastern Cape's Sunshine Coast. Here the first teaser: pic.twitter.com/WOYR1IeDrc

— TVwithThinus (@TVwithThinus) May 26, 2022

Nico Panagio is ook terug as die gewilde reeks se aanbieder en die volledige lys deelnemers – wat uit ʼn verskeidenheid van Survivor-“uitgeworpenes” van al die vorige seisoene bestaan – sal op Sondag 5 Junie bekendgemaak word.

Maroela Media het vroeër berig dat Nicole Wilmans, ʼn digitale bemarker van Somerset-Wes in die Wes-Kaap, verlede jaar die prysgeld van R1 miljoen in haar sak gesteek het.