Bly in ŉ igloe, sien die noorderligte!

Een van die igloes waar jy kan oornag (Foto: Antti/AirBnB)

As jy al ooit daarvan gedroom het om onder die noorderligte te slaap, is hierdie dalk jou droomvakansie – as jy bereid is om die koue te trotseer, natuurlik!

Jy kan ŉ dié “sneeu-igloe” in Pelkosenniemi in Lapland, Finland, op AirBnB bespreek teen ongeveer R1 100 per aand.

Volgens die beskrywing op AirBnB is daar regte beddens in die igloe. “Lekker atmosfeer met LED-ligte en wit mure. As jy gelukkig is, sal jy die noorderligte buite sien. Kom na Lapland en verken die wildernis!”

Daar is egter ŉ waarskuwing: dit is altyd minus grade in die igloe. “Ons verskaf ŉ warm slaapsak, maar jy moet jou eie termiese klere, warm hoed, sokkies en handskoene bring. ŉ Koplamp of flitslig kom ook handig te pas. Daar is ŉ warm huis beskikbaar in noodgevalle.”

Die igloe is geleë langs Pyhäjärvi-meer en die Pyhä-Luosto Nasionale Park.

“Dit is ŉ een-keer-in-ŉ-leeftyd-geleentheid om in ŉ sneeu-igloe te slaap wat ons elke winter self bou!”

Elke groep het hul eie igloe (vier persone per igloe). Moenie bekommerd wees nie: as dit te koud is vir jou, is daar ook ŉ huis met toilette, ŉ stort, sitkamer en klein kombuis waarvan gaste enige tyd (dag of nag) gebruik mag maak.

Ryan, wat in Maart 2019 in die igloe oorgeslaap het, was vol lof. “Ons was net daar vir een aand, maar ons was gelukkig om die noorderligte te sien. Dit was absoluut wonderlik.”

Allison het in Februarie oornag. Sy laat weet die gasheer, Antti, het hulle selfs op ŉ slee laat ry met die husky-honde.

Meer inligting beskikbaar op AirBnb se webwerf