Die poppies wat juffrou Ingeborg gebrei het (Foto: Facebook)
Sekere onderwysers mis hul kinders baie, maar dalk nie so baie soos dié juffrou wat poppies gebrei het wat presies soos haar klas lyk nie.
Juffrou Ingeborg Meinster-Van der Duin is ʼn onderwyseres by Dr H Bavinckschool in Haarlem, Nederland. Die skool het, net soos talle ander wêreldwyd, gesluit weens die Covid-19-pandemie.
“Die kinders was nie meer in die skool nie. Ek het hulle baie gemis,” het sy aan NH Nieuws gesê. Toe sy ʼn breipatroon op Pinterest sien, het sy dadelik besluit om ʼn poppie vir elkeen van haar skoliere te brei.
Sy het 23 poppies gemaak wat presies soos elke kind lyk, met al die detail ingesluit soos hul truie, sproete, ʼn bril en haarstyle. Elke poppie het tussen drie en vier ure geneem om te maak.
Sy het ʼn foto van die poppies aan haar klas en hul ouers gewys. Sonder name kon hulle almal maklik hulself en die ander maats herken.
Juffrou Ingeborg het gesê sy sien beslis uit daarna om haar kinders gou weer te sien.
Dit is ‘n liewe juffrou. Hoe bevoorreg is die kindertjies wat so ‘n spesiale een vir ‘n juffrou het. Hulle verlang seker net so baie na haar.
Ek wens jy was my juffrou gewees. Jy is ‘n dierbare mens. ♥
Dis nou oulik!
Ag is dit nou nie oulik nie.
Wat ‘n skitterende gedagte.
Ek is seker daarvan dat daar te lande ook onderwysers(esse) is wat so oor die kinders voel.