Glen en Vida Rafferty (Foto: Facebook)
’n Man is in hegtenis geneem in verband met die moord op die egpaar Glen en Vida Rafferty wat verlede maand koelbloedig buite hul plaashuis in Normandien naby Newcastle in KwaZulu-Natal doodgeskiet is.
Brig. Jay Naicker, woordvoerder van die polisie, het Sondag gesê ’n29-jarige man is deur speurders van die provinsiale eenheid vir georganiseerde misdaad van Osizweni in Newcastle in hegtenis geneem.
“Hy is toe na ’n landdros geneem waar ’n bekentenis geboekstaaf is.”
Volgens Naicker is die verdagte formeel van twee aanklagte van moord aangekla.
Hy sal na verwagting Maandag in ’n hof verskyn.
Glen (63) en Vida (60) se liggame is op 30 Augustus vroegoggend buite hul plaashuis aangetref. Die egpaar is die vorige aand koelbloedig doodgeskiet nadat hulle van Newcastle tuisgekom het. Een van hulle honde is ook tydens die aanval doodgeskiet.
Die aanvallers het vroeër die veiligheidskameras buite die huis buite werking gestel.
Daar kon ná die moorde op ʼn veiligheidskamera wat die landelike paaie in die gebied monitor gesien word hoe die egpaar kort voor die moord uit die dorp in die rigting van hul plaas ry. Nie lank ná die moorde nie, kan weer gesien word hoe die moordenaars in hul voertuig op ʼn ander pad van die toneel vlug.
Volgens Naicker duur die ondersoek voort en nog inhegtenisnemings kan verwag word.
Geen in hegtenis neming, lewenslange tronkstraf, niks kan die verlies aan lewe herstel nie.
Hierdie moorde verwoes als.
As daar doodstraf was, sou hulle dalk versigtiger gewees het, maar ja….
Ek wonder partykeer hoe dink hierdie moornenaars hul gaan nie gevang word nie, want in 90% van die gevalle word verdagtes aangekeer en gevang.
Dit wys maar net weereens dat tronkstraf nie ‘n afskrikmiddel is vir hulle nie.
Tronk toe – lewenslank tot hy sy laaste asem uitblaas – LEWENSLANK VERDIEN NIKS MINDER NIE
Geluk aan die Polisie.
Tronk toe is soos om in n veiligheidsoord te bly. Hoender en tv elke dag en mediese versorging asook stemreg. N veilige hawe sou ek se. Miskien wil hulle in die tronk wees