Video: Marelize oor dáái val: ‘Dit was skreeusnaaks!’

‘n Skermskoot uit die video van Marelize Horn se nou beroemde val.

Sy het byna oornag die splinternuwe sensasie onder Afrikaanssprekendes geword – die jong meisie wat reguit met haar fiets teen ʼn rugbypaal vasry en haar ma wat reageer met die nou byna ikoniese “My f** Marelize”.

Maar Marelize Horn (19) van Windhoek in Namibië het nooit kon dink haar flater sou só wyd versprei dat dit naderhand die hele Suid-Afrika aan die skater het nie.

“Ek het die afgelope paar dae wakker geword en vir my ma gevra, is dit ʼn droom? Ek kan nie glo dit het so groot geword nie. Dit voel onwerklik!” sê sy Vrydagoggend aan Maroela Media.

Sy vertel die video is Saterdag geneem toe sy en haar ma na die naaste skool aan hul huis, Affies Park, is sodat sy daar fiets kan ry. “Ek is 19 jaar oud en kon nog nooit fietsry nie. Toe besluit ek net, nóú moet ek leer fiets ry.”

Sy beplan om later vanjaar in Nederland as au pair te gaan werk en is daarom vasbeslote om fietsry nou onder die knie te kry.

Maar, erken sy, dit was maar ʼn gesukkel aan die begin. “Ek wou leer fiets ry, maar die fiets wou nie geleer word nie,” lag sy. Haar ma, Heidi Horn, het besluit om ʼn video te neem sodat sy kan sien wat sy verkeerd doen.

“Toe ry ek daar op die rugbyveld en ek dink ‘oukei, ek gaan nou regs verby die pale ry’, maar die fiets gaan links en daar ontmoet ons mekaar reg in die middel. Dit was soos ʼn magnetic attraction tussen my en daai paal en daar skiet ek oor die fiets en land op my bas!”

Marelize sê ná haar ma se aanvanklike “My f** Marelize”, het sy begin lag … en lag en lag. “Dit was skreeusnaaks! Teen die tyd dat sy by my kom, het die trane uit haar oë geloop soos sy lag. Daar was mense op die pawiljoen wat gesien het wat gebeur en ons kon hoor hoe hulle lag. Ek het net so hard gelag. Dit was vrek snaaks.”

Dit was eers die volgende oggend dat Marelize gesien het sy is vol kneusplekke van die val, maar daaraan is sy al gewoond, sê sy. “Ek is ʼn regte ongeluksvoël. Ek val seker drie keer ʼn dag! Daardie woorde op die video sê my ma gereeld vir my – dié dat dit so maklik van die tong af rol!”

Marelize het die video op haar Instagram-profiel gedeel en vir haar suster gestuur wat in Potchefstroom studeer sodat sy kan deel in die pret. Haar suster het dit op ʼn paar van haar WhatsApp-groepe gedeel en van daar het dit soos ʼn veldbrand versprei. Toe Marelize die volgende oggend wakker word, was sy en haar beroemde val op al wat sosialemediaplatform is te sien.

“Vergeet die mag van sosiale media, kyk net na die mag van Afrikaanse mense! Mense sê ons kultuur gaan dood, maar dit is glad nie die geval nie. Dié ding wys net weer hoe sterk ons kultuur is en hoe ons kan saamlag,” sê Marelize.

Voel sy ʼn bietjie skaam dat miljoene mense haar flater aanskou het? “Glad nie! Ek het ʼn baie groot persoonlikheid, so ek kom gereeld in sulke situasies waar almal vir my lag. Ek het een dag by die skool op die trappe geval en gerol al die pad tot onder voor ʼn skare mense. En natuurlik het almal net gelag! Ek weet nou al mense lag vir die dom goed wat ek aanvang.”

En ja, sy is deeglik bewus van al die grappies, die liedjies, die gedig en die memes wat nou op die internet die ronde doen ná haar val. “Ek sien gister het iemand iets geplaas oor Eskom wat nou weer fase 1-beurtkrag gaan ingaan, met die hutsmerk ‘My f** Marelize’. Ek is nou al sommer soos Eskom!”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

69 Kommentare

jongste oudste gewildste
Hanna

Sy het nie net die hele Suid-Afrika aan die skater nie, maar Suid-Afrikaners regoor die wêreld lag saam. Ek het die video menigmale op Facebook gesien en my vriendin in Holland het dit vir my per WhatsApp ook gestuur. Groete vanuit die VSA.

Christelle

Jy is awesome Marelize. Luv jou uitkyk op die lewe. You go girl.

Blom

Dit was beslis nie ‘n wyse besluit om op gras fiets te ry nie. Jy val miskien sagter, maar jy trap moeiliker. Sy sal definitief hierdie voorval vir die res van haar lewe onthou. En sy het vir my laat lag!

Pieter

Hier is my kommentaar daaroor, als het nou al so saai in die land geraak selfs hierdie video trek aandag, dit sê darem baie.
Skuus, wat is so snaaks daaraan? Sy is ‘alleen’ op die rugbyveld, ry met die fiets teen die paal vas en toevallig is daar iemand wat die petalje afneem.
Kom ek vra so, nemende in ag die grootte van ‘n rugbyveld, probeer jy een van die rugbypale misry of probeer jy dit raakry?

ek sê maar

Dit was VREKsnaaks. Ons het almal gelag en ek kyk gereeld na dit en lag van vooraf. Lag is omtrent al wat mens nog positief laat voel elke dag!