My geliefde broers en susters, wees altyd gou om te luister. Julle moet mense word wat dóén wat die woord sê. Moet dit nie net aanhoor nie; dan bedrieg julle julleself. (Jakobus 1:19, 22)
Om ’n dóéner te wees, is ’n baie goeie eienskap. Selfs die Bybel vra dat ons dáders van die Woord moet wees. Veral mans wil graag iets dóén, veral as hul vrou of kind met iets sukkel. Maar hierdie mooi eienskap kan ook soms verkeerd loop – as ons swak luisteraars is. Dan spring ons weg en doen iets vir ons geliefdes voordat ons baie seker gemaak het dat dit die regte ding is.
Soms wil ’n vrou met haar man gesels bloot net om haar gevoelens met hom te deel, nie sodat hy alles moet oorneem en dit namens haar doen nie. Soms kweek jy afhanklikheid en uiteindelik swakheid by ’n kind as jy oorneem, en hulle nie leer om dinge self te hanteer nie. Daarom moet daders eers goeie luisteraars wees. Wanneer jy dan verstaan wat die ware behoeftes is, sal jy iets kan doen wat ware hulp is, iets wat pas by die gesonde behoefte. “Daders van die Woord” begin by die Woord. Luister eers na God se woorde, en doen dan.
Jakobus 1:19 én 22 is nodig om balans te kry in die uitlewing van jou geloof.