Argieffoto (Foto: Omar Elsharawy/Unsplash)
“ʼn Derde keer vra Jesus hom: “Simon, seun van Johannes, het jy My lief? Kan Ek heeltemal op jou lojaliteit staatmaak?” Petrus het hartseer geword omdat Jesus so aanhou. “Here,” sê hy toe, “U hoef nie eens te vra nie, want U weet alles; ook wat in my hart aangaan. U weet mos hoe lief ek vir U is.” “Sorg dan vir my skape,” sê Jesus” (Johannes 21:17).
Skrifgedeelte
Johannes 21:17
Oordenking
Net gister kuier ek saam met ʼn jongmens wat so ʼn jaar gelede vreeslik met sy lewe gemors het. Baie mense wou hom afskryf. Dit is tipies: In vandag se lewe is daar min geleentheid vir tweede kanse, want mense is ongenaakbaar teenoor mekaar. Hy het egter sy les geleer en reggemaak met die Here. Ja, hy het sy verhouding met God herstel omdat God altyd tweede kanse gee, want Hy is ʼn genadige en liefdevolle God.
Petrus is een van Jesus se getrouste volgelinge. Tog ontken Petrus drie keer dat hy Jesus ken. Daarmee is Jesus kruis toe en Petrus kon nie met Jesus regmaak nie. Ná Jesus se opstanding verskyn Jesus aan Petrus en vra hom drie keer (nie toevallig nie) of Petrus Hom liefhet. So kry Petrus die geleentheid om sy verhouding met God te herstel en vir Jesus te sê dat hy Hom werklik liefhet.
Waar staan jy in jou verhouding met God? Is daar dalk dinge wat maak dat jy baie skuldig voel teenoor die Here? Soos Petrus ʼn kans gekry het om sy verhouding met God te herstel, is dit nou jou beurt. Wat wil jy regmaak? Gebruik die geleentheid – word stil en herstel jou verhouding met Hom.
- Hierdie oordenking verskyn in Leef gefokus deur Johan Smith. Dit word goedgunstiglik deur die Christelike Uitgewersmaatskappy/CUM verskaf.
