Foto: pixabay.com
Daarom – as julle dink julle staan sterk, moet julle oppas dat julle nie ook tot ’n val kom nie. Onthou, die versoekings wat oor julle pad kom, is nie uniek nie; ander ondervind dit ook. God is getrou. Hy sal keer dat die versoeking te sterk vir julle word. Midde-in die versoeking sal Hy vir ’n uitweg sorg sodat julle dit kan verduur. (1 Korintiërs 10:12-13)
Ons is dikwels onbewus van die simptoomvrye maar dodelike toestande soos gloukoom en hoë bloeddruk voordat dit reeds te laat is. Dit is glad nie nodig om paranoïes te raak nie, maar dis noodsaaklik dat ’n mens gereelde roetineondersoeke het. Kennis is mag – en die beste sorg is voorsorg!
Ook ons geestelike lewens spring nie hierdie stille sluipmoordenaars vry nie: trots, ontkenning en selfgenoegsaamheid kan aan jou siel vreet sonder dat jy dit noodwendig agterkom. Maak gereelde afsprake by jou Hartdokter om seker te maak jy wandel in die waarheid (Johannes 16:13). Laat Hom toe om jou van kop tot tone met sy oorweldigende liefde te ondersoek en te deursoek.
Dankie Here dat ek in geloof met U mag wandel…versterk my in Jesus Naam