Die taak van ouer wees word nie makliker nie … Trouens, talle kundiges reken dat die klimaat en realiteite waarin vandag se jongmense moet groot word toenemend meer uitdagend raak.
Hoe berei ons as ouers ons kinders voor vir ʼn onsekere toekoms?
In ʼn splinternuwe podsendingsreeks, Pot Vol Kennis, neem onafhanklike skolenetwerk Die Mos-Inisiatief luisteraars op ʼn reis om onderwerpe soos die toekoms van opvoeding, die belangrikheid van aanpasbaarheid en die omarming van verskillende leervoorkeure te bestudeer. Aanbieder Jacques Basson gesels met ʼn verskeidenheid kenners en belanghebbendes soos onderwysers, ouers, navorsers en entrepreneurs om ʼn wêreld vol inspirasie en onbeperkte moontlikhede te ontsluit.
“As ons terugkyk na toe ons nog op skool was teen vandag, sien ʼn mens dat absoluut niks verander het nie,” sê Geertjie de Beer, ouer by Mos-Wêreldwyd.
Dit is hierdie tipe bekommernisse wat Die Mos in 2019 aangespoor het om ʼn alternatief tot verouderde skoolsisteme te ontwikkel.
“Namate die wêreld vooruit gaan terwyl die opvoedkundige struktuur staties bly, was dit vir ons as gesin noodsaaklik om alternatiewe roetes vir ons dogter te verken. Ek beoog nie dat my kind te alle tye volmaaktheid moet behaal nie, maar ten minste moet sy die vermoë hê om vir haarself te dink, take onafhanklik aan te pak, en uitdagings sonder vrees aan te gaan,” voeg Geertjie by.
Buiten ontwikkelingsvereistes soos entrepreneurskap, samewerking en kreatiwiteit, beklemtoon Die MOS se benadering ook die holistiese ontwikkeling van hul leerders. Aspekte soos emosionele intelligensie en veerkragtigheid word op die voorgrond geplaas.
Onderwerpe waarna luisteraars onder andere kan uitsien, sluit in:
- Verskillende maniere hoe kinders leer: Leonie Marques en Wikus Breetzke deel waardevolle inligting oor die maniere waarop kinders kan leer en die vorming en versterking van neurale bane tydens die leerproses.
- Hoe werk die brein tydens leer? Daar bestaan baie mites oor die brein, soos die idee dat mense slegs 10% van hul brein gebruik, maar in werklikheid word alle dele van die brein tydens take benut. Lieb Liebenberg en Wikus Breetzke ondersoek maniere hoe om vir jou kind omgewings te skep wat breinontwikkeling aanmoedig en stimuleer.
- Is jou kind voorbereid op die toekomstige werkplek? Roedolf van der Westhuizen, uitvoerende hoof van Die Mos, ondersoek die wanbelying tussen huidige onderrig en professionele sukses en hoe dit oorbrug kan word.
Of jy nou ’n onderwyser, ’n leerling of ’n ouer is, beloof hierdie reeks om jou te help om op nuwe maniere te dink nie net oor onderrig en die toekoms daarvan nie, maar ook jou kind se rol daarin.
Al 13 episodes van Pot Vol Kennis kan gratis geluister word en is op Apple Podcasts, Spotify, Podbean en alle ander betroubare stroomdienste in Suid-Afrika beskikbaar. Klik op die skakels en leer en luister saam.
- Die Mos-Inisiatief staan vir Moedertaalonderrig in Onafhanklike Skole. Leer gerus oor hul toekomsgerigte leeropsies vir jou kind. Besoek https://www.diemos.co.za/.
