‘Bonjour’, Wêreldbeker! Ja, die langverwagte Wêreldbeker-rugbytoernooi is uiteindelik hier en sommige Suid-Afrikaners pak al hul tassies vir Frankryk om eerstehands te kyk hoe die Springbokke hul titel verdedig.
Dié 10 Franse frases sal dit makliker maak om met plaaslike inwoners te kommunikeer, aanwysings te vra, kos te bestel, daaglikse aktiwiteite te navigeer, en selfs vir die Bokke in Frans te skree!
(Foto: Odd Anderson/AFP)
- Je voudrais du champagne, s’il vous plait – Daar is niks so lekker soos om ʼn internasionale avontuur met ʼn glas vonkelwyn op die vliegtuig te vier nie. Air France is die enigste lugredery ter wêreld wat sjampanje in alle kajuitklasse aanbied. Beïndruk jou lugwaardin met hierdie frase en geniet die land se lekkerste sjampanje.
- Allez Bokke! – Suid-Afrikaners is nie bang om hul nasionale span luidkeels te ondersteun nie. Hierdie frase beteken “komaan Bokke!”. As jy dit saam met ander ondersteuners dreunsing, sal almal in die stadion weet presies wie jy in hierdie Wêreldbeker ondersteun!
- Où est le stade? – Hierdie vraag – vertaal na “waar is die stadion?” – sal op wedstryddae jou rigtingwyser wees. Of jy nou in Parys, Marseille of enige van die ander gasheerstede is, gebruik hierdie frase om te verseker dat jy die hart van die aksie bereik.
- Une bière, s’il vous plait – Ná ʼn opwindende wedstryd is daar niks so lekker soos ʼn koue bier om die spel te vier of bloot die lewendige atmosfeer te geniet nie. “ʼn Bier, asseblief”, sal help om jou voorkeurdrankie te verseker.
- Combien ça coûte? – Dit is ʼn uiters belangrike frase om te onthou wanneer jy Frankryk besoek. Vertaal na “Hoeveel kos dit?” sal dit jou help wanneer jy aandenkings koop.
- J’adore le rugby! – Rugbyondersteuners van oor die wêreld sal Frankryk in September volpak. Hierdie frase wat na “ek is mal oor rugby” vertaal word, sal help om jou passie vir die sport aan mede-aanhangers uit te druk en om gesprekke aan te knoop.
- Parlez-vous anglais? – Nog ʼn belangrike frase vir ʼn besoek aan Frankryk is “praat jy Engels?”. Om hierdie vraag in Frans te vra, toon respek vir die plaaslike kultuur en taal, terwyl dit aandui dat die taalversperring ʼn bietjie ingewikkeld kan raak.
- C’est incroyable! – Terwyl jy na die talle wedstryde kyk, sal ongelooflike drieë en ontsagwekkende tonele volop wees. Met hierdie frase wat beteken “dit is ongelooflik!”, kan jy jou verbasing aan plaaslike toeskouers kommunikeer. Sport bewys voortdurend dat ʼn gedeelde waardering vir die spel aanhangers van alle nasies bymekaar kan bring.
- Quel est le prochain match? – Die Wêreldbeker-wedstrydskedule kan nogal verwarrend raak, so om ander ondersteuners vir inligting te vra, kan jou beste opsie wees om te verseker dat jy nie ʼn wedstryd misloop nie. Vertaal na “Wie speel volgende teen mekaar?” sal dit jou help om ingelig te bly oor die toernooiskedule sodat jy nie ʼn belangrike wedstryd misloop nie.
- Merci beaucoup! – Moenie vergeet om jou dankbaarheid met ʼn opregte “baie dankie!” uit te spreek terwyl jy hierdie onvergeetlike ervaring aanpak nie.
Mense waardeer dit as reisigers om verskeie redes moeite doen om die plaaslike taal aan te leer. Met dié Franse frases sal reisigers nie net ʼn vlug op Air France of Frankryk se strate en stadions met gemak kan aanpak nie, maar smee hulle ook bande wat dieper as taal strek.
