Die ongelukstoneel op die R550 in Walkerville. (Foto: ER24)
Altesaam 25 mense is Woensdagoggend beseer toe ’n vragmotor, twee minibustaxi’s en ’n bakkie op die R550 in Walkerville, suid van Johannesburg, gebots het.
Russel Meiring, woordvoerder van ER24, sê paramedici van verskeie nooddienste het ná 10:00 op die toneel aangekom en die bakkie en vragmotor in die een baan aangetref. Die twee taxiwrakke het aan weerskante van die pad gestaan.
Verskeie beseerdes het in dié stadium op die toneel rondgeloop.
Almal is ondersoek en daar kon vasgestel word dat 25 mense ligte tot matige beserings tydens die botsing opgedoen het. Die beseerdes is almal op die toneel behandel voordat hulle na nabygeleë hospitale vervoer is vir verdere mediese behandeling.
Die presiese omstandighede rakende die botsing is nie in dié stadium bekend nie.
Die plaaslike owerhede was vanoggend op die toneel om ondersoek in te stel.
Die ongelukstoneel op die R550 in Walkerville. (Foto: ER24)
Vragmotor en Taxi’s betrokke. Algemene ongeluk op wiele!