Aanvallers breek Centurion-pa se skedel

Alexander Bezuidenhout. Foto: Facebook

Alexander Bezuidenhout. Foto: Facebook

ʼn Jong pa van Centurion se skedel is op vier plekke gebreek nadat hy deur rowers oorval en aangerand is terwyl hy met sy fiets op pad huis toe was.

Alexander Bezuidenhout (25) sal volgende week in die Steve Biko-hospitaal geopereer word, nadat sy skedel, oogbank en wangbeen tydens die aanval gebreek is. Hy het ook verskeie ander kneusplekke op sy lyf opgedoen.

Arno Alberts (26), Alexander se neef, het Donderdag aan Maroela Media gesê dat Alexander tydelik by hom en sy vrou in Rooihuiskraal, Centurion, ingetrek het. “Hy het drie weke terug met ʼn nuwe werk begin nadat hy lank werkloos was. Die werk is net 5 km van ons huis af en hy kon sommer met ʼn fiets werk toe en terug ry,” het Alberts gesê.

Hy vertel dat Alexander, die pa van twee jong kinders, verlede Maandag omstreeks 18:30 op pad huis toe skielik ʼn harde hou teen sy gesig gevoel het. “Hy het eers gedink iemand het hom met ʼn bottel uit ʼn verbygaande motor gegooi. Toe hy stilhou en omkyk, het hulle hom weer deur die gesig geslaan.”

Drie mans het Alexander met ʼn stok geslaan en hy het van sy fiets afgeval. Hulle het hom oor die versperrings langs die pad getel en die veld in gedra. Daar het hulle hom verder met die stok aangerand, geskop en geslaan. Volgens Alberts het hulle al Alexander se persoonlike items by hom afgevat voordat hulle gevlug het.

“Hy het teruggestrompel pad toe waar hy probeer het om een van die verbygaande motors te laat stop, maar almal het net by hom verbygejaag.” Hy het gesê Alexander kon uiteindelik daarin slaag om een van die bestuurders se aandag te trek wat hom opgelaai en huis toe geneem het.

“Ek was by die huis toe ek net hoor hoe hy om hulp skree en huil soos hy aangehardloop kom. Toe ek uitgaan, het ek hom gesien aankom met die bloed wat oor sy gesig stroom,” het Alberts gesê.

Die twee is die volgende dag polisiestasie toe waar hulle die saak aangemeld het. Hulle het glo eers by die misdaadtoneel omgery waar die stok steeds gelê het en dit saamgevat polisiestasie toe. “Die polisie het reguit vir ons gesê die stok is nutteloos en hulle kan nie daarop vingerafdrukke afneem nie,” het Alberts gesê.

Intussen moet Alexander by die huis wag tot die hospitaal hom kan opereer. Kapt. Boginkosi Msimango, polisiewoordvoerder, het die voorval aan Maroela Media bevestig en gesê ʼn saak van roof word ondersoek. Geen verdagtes is nog in verband met die voorval in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
MARTIN

IS DIT NOU NODIG?

Liewe lulu

Hoe eerder die slagoffers die MRK begin dagvaar, hoe gouer gaan die misdaad afneem. Punt

gogga

” ‘n saak van roof word ondersoek”??

Rerig.

Mari

Hoe kan ons die man en sy gesin help?

KoosDelRay

Ons sukkel alreeds so finansieel, dan kom die demone en val ons nog aan ook. Vader Vader help ons!