’n Afgetrede verpleegster (63) is Saterdagoggend ernstig beseer in ’n motorongeluk tussen Sasolburg en Parys in die Vrystaat.
Ross Campbell, woordvoerder van ER24, sê in ’n verklaring paramedici is omstreeks 08:20 saam met die plaaslike brandweerdiens na die toneel ontbied waar omstanders reeds die vrou halfpad uit die motorwrak getrek het. Die motor het op sy dak in ’n sloot gelê.
Volgens Campbell het die vrou ernstige beserings in die voorval opgedoen en is op die toneel behandel voordat sy na die Metsimaholo-hospitaal in Sasolburg gehaas is. Sy is sedertdien na die Emfuleni-hospitaal in Vanderbijlpark oorgeplaas.
Die toepaslike owerhede was vanoggend op die toneel om ondersoek in te stel.