ANC hoogs verdeeld oor OB

ANC-se-vlag-deur-ANA

(Argieffoto: ANA)

Pemmy Majodina, ANC-hoofsweep in die parlement, se mediaverklaring Saterdag oor die openbare beskermer staan voluit in die teken dat die hare gewaai het tydens ʼn koukusvergadering oor hoe om die kwessiete hanteer.

Maroela Media het vroeër berig Majodina het Saterdag gesê die party het nog nie besluit of sy parlementêre koukus vir of teen die verwydering van adv. Busisiwe Mkhwebane as openbare beskermer sal stem nie. Die party het onderneem om voluit deel te neem aan die proses om bestek op te neem van haar werk en toekoms.

Die DA-hoofsweep, Natasha Mazzone, het die proses om Mkhwebane moontlik verwyder te kry, aan die gang gesit.

Majodina se lang en versigtig bewoorde mediaverklaring laat blyk dat die detail op die punt is om op skadelike wyse uit te lek en dat die ANC solank skadebeheer doen.

Die proses is dat ‘n paneel regslui moet besluit of daar ‘n prima facie-saak teen Mkhwebane is. Dan moet ‘n veelparty parlementêre ad hoc-komitee die getuienis oorweeg en ‘n aanbeveling maak. Daarna moet die Nasionale Vergadering stem oor of Mkhwebane kan aanbly en of sy verwyder word.

Nadat ‘n paneel onafhanklike en vooraanstaande regslui hierdie week op grond van die ingediende getuienis besluit het daar is genoegsame geldige inhoud in die klagtes dat die parlement kan voortgaan met die proses om te bepaal of Mkhwebane in haar pos moet aanbly of daaruit verwyder word, het die ANC-koukus dit hierdie week bespreek.

Die ANC is egter hoogs verdeeld oor hoe om die kwessie te hanteer. Aan die een kant is daar ‘n groep wat meen die kwessie moet bloot op meriete en die beskikbare getuienis hanteer word, en ‘n besluit oor Mkhwebane moet aan die hand daarvan geneem word.

Aangesien die ANC-koukus uiteindelik glad nie sal besluit hoe hulle moet stem oor die saak nie (die ANC-koukus kry instruksies van die ANC-hoofkwartier by Luthuli-huis oor hoe om rakende elke kwessie te stem en moet dit volg, sonder eie denke of voorkeur) is so ‘n uitkyk raaiselagtig.

‘n Tweede groep meen reeds die ANC moet teen Mkhwebane se verwydering stem. Die mees uitgesproke lid van dié groep is die party se sekretaris-generaal, Ace Magashule, wat in die openbaar verklaar het omdat Mazzone die proses geïnisieer het, moet die ANC in elk geval daarteen stem want hy meen die ANC moet nie die DA steun nie.

‘n Derde groep in die ANC meen Mkhwebane is ‘n onbekwame verleentheid wat uit haar pos verwyder moet word. Dit sluit verskeie hegte vertrouelinge van pres. Cyril Ramaphosa in.

Majodina se mediaverklaring begin met ‘n lang en deeglike uiteensetting van die parlementêre proses, en sy repudieer dan indirek vir Magashule deur te sê dit is nie ‘n DA-proses nie, en dat die ANC nog nie besluit het hoe om te stem oor hierdie kwessie nie.

In ‘n duidelike bevegting van die persepsie wat die Magashule-groep probeer skep dat Mkhwebane onregverdig geteiken word, het Majodina uitgewys dat die openbare beskermer ten volle die geleentheid sal hê om haar kant van die saak aan die ad hoc-komitee te stel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Adri

Daar makeer ‘n woord in die eerste sin. Kom ons vertrou dat die ANC hierdie keer gaan besef dat kaderbeskerming hulle straks duur te staan gaan kom.

JM

Besluitloos soos altyd!

Dup

Patetiese klomp narre!

Kokerboom

So ‘n kwessie oor OB verwydering..mens sou sweer dis die President!!!
Wil NIKS weet van die klomp regime narre insluitend hul president!

Anton

Ek het ‘n mentor gehad wat my geleer het: Not deciding is deciding to do nothing