Bernice West en Jannes Erasmus verloof

Op ’n strand in Zanzibar is Bernice West en Jannes Erasmus nie net besig om ’n suksesvolle musiekspel en ’n splinternuwe album te vier nie, dié twee klink nou ook ’n glasie op die ring wat sedert gister (26 Junie) aan West se vinger pronk.

Terwyl die tweetjies op die strand lê en ontspan, borrel die opgewondenheid oor terwyl hulle met Maroela Media gesels.

“Ek kan nie ophou glimlag nie! Dit slaan my nog elke nou en dan weg,” het West gesê.

Erasmus, wat Sondagmiddag tydens sonsondergang op die strand die groot vraag gevra het, vertel dat hy dit so romanties moontlik wou maak.

“Hier besit die regering eintlik die strande, en ek weet mens kan in hegtenis geneem word as jy so iets op die verkeerde plek doen. Ek moes versigtig wees en het dit maar in my eie hande geneem.”

Die risiko het egter vrug afgewerp, en hy het tans ’n stralende verloofde wat langs hom sit.

Die paar, wat al byna drie jaar uitgaan, het op die verhoog ontmoet, en dit is daar waar hul liefde voortgeblom het.

Op die planke van die AfriForum Teater in Pretoria het Erasmus en West saam aan die musiekspel, Die Gelofte, gewerk. Erasmus as regisseur en skrywer, en West as die mooie Maria.

Ná twee suksesvolle speelvakke, het die paartjie Zanzibar toe vir ’n welverdiende blaaskans vertrek.

Erasmus vertel skertsend dat West snuf in die neus gekry het toe hy tydens een van die Die Gelofte-vertonings na een van haar ringe wou kyk.

“Haar naeltegnikus het ook gespot en gesê dat sy ’n mooi kleur moet kies, sy gaan dalk foto’s van haar hand wil terugbring.”

West raak opgewonde wanneer sy vertel hoe Erasmus haar been trek oor hoe baie sy glimlag.

“Hy spot my al en sê dat dit nou werklik goed is dat ons nie meer maskers in Suid-Afrika hoef te dra nie, nou kan ek vir almal wys hoe gelukkig ek is.”