Boschkop-kleinhoewemoord: Dood van geliefde ‘ysterbroer’ ruk gemeenskap

Eva en Henry Kirstein. Foto: Verskaf

Eva en Henry Kirstein. Foto: Verskaf

ʼn Gebroke familie wat vanjaar die geliefde sakeman, pa en buiteleweliefhebber Henry Kirstein se 60ste verjaardag sou vier, tref nou sy begrafnisreëlings nadat hy tydens ʼn kleinhoewe-aanval buite Pretoria voor sy vrou, Eva, doodgeskiet is.

Maroela Media het Vrydag berig Henry is Donderdagaand in sy huis op ʼn kleinhoewe in die Mooiplaats-omgewing naby Boschkop, oos van die stad, doodgeskiet toe minstens sewe aanvallers toegeslaan het.

Die aanvallers het toegang tot die goedbeveiligde kleinhoewe verkry deur twee veiligheidswagte te oorval en met gewere aan te hou nadat hulle vermoedelik vroeër die dag die heinings geknip het. Een van die wagte is by die hek vasgebind en hulle het die ander wag tot by die huis gedwing waar hulle Henry, sonder om ʼn woord te sê, in die rug geskiet het terwyl hy aan die kombuistafel gesit het. Hy is op die toneel dood.

Hulle het vir Eva gedwing om die kluis uit te wys waarna hulle onder meer met R800 000, Amerikaanse dollars en twee vuurwapens op die vlug geslaan het.

Leon Kirstein (45), Henry se stiefbroer, het Maandag aan Maroela Media gesê die familie sukkel om hierdie “sinnelose, koudbloedige” moord te verwerk.

“Dit bring soveel hartseer vir ons familie. Henry was seker die hardwerkendste man op Gods aarde. Sy familie was sy alles en ons is ʼn groot familie,” het hy emosioneel gesê.

Henry was in ʼn vennootskap en die mede-eienaar van ʼn fabriek in Silverton wat waterboormasjiene vervaardig en uitvoer, onder meer na Dubai.

“Hy woon al jare op sy kleinhoewe. Hy het die plek baie mooi opgeknap en vergroot deur aangrensende kleinhoewes aan te koop. Hy was baie veiligheidsbewus en daar is goeie sekuriteit wat vir ons die aanduiding gee dat die aanval goed beplan was.”

Leon beskryf sy “ouboet” as ʼn eerlike man met ʼn groot gees wat die land en mensdom liefgehad het. “Hy sou alles vir sy werkers, familie en medemens doen. Henry se geloof in God en sy medemens was aansteeklik en sy liefdadigheidswerk in die omgewing wel bekend.”

Henry was lief vir die buitelewe. Hy het daarvan gehou om sy vrye tyd langs die viswaters deur te bring en was lief vir diepseehengel. Hy was boonop ʼn kranige skut, het skyfskiet beoefen en het graag gejag.

“Hy sal onthou word as ʼn ouboet, pa, eggenoot en seun met ʼn asemrowende dryf in die lewe. Hy was ʼn voorbeeld vir almal wat met hom te doen gehad het en het bitter min die verkeerde in mense raakgesien. Hy was altyd optimisties oor ons volk en land se toekoms en het geglo dat die keuses wat ons daagliks maak ons toekoms bepaal. Hy was diep gelowig.”

Leon het gesê die moord maak geen sin nie, behalwe dat mense in die afwesigheid van morele waardes leef onder ʼn regering wat sy rug op sy mense gedraai het. “Ons sal nie gaan lê nie, my broer sou dit nie wou hê nie. Ons as familie gaan sterker hier uitkom en ons opnuut aan die welstand van ons mense wy. Nou moet ons eers my ysterbroer se moord verwerk en op ons knieë die uitweg en pad vorentoe bepaal.”

Volgens Leon kry Eva en Henry se seuns swaar ná die moord. Hulle ontvang berading en word deur familie bygestaan.

Veiligheid by die kleinhoewe is intussen verder opgeskerp.

Kapt. Marissa van der Merwe, waarnemende stasiebevelvoerder en woordvoerder van die Boschkop-polisie, het Maandag aan Maroela Media gesê niemand is nog in verband met die voorval in hegtenis geneem nie. “Die polisie is besig om leidrade op te volg en die ondersoek duur voort,” het sy gesê.

Henry laat sy vrou, seuns, pa, broers en susters en uitgebreide familie agter.

Hy sou op 21 Maart 60 geword het.

ʼn Gedenkdiens word Donderdag om 11:00 by die 3CI Kerk in Saalstraat in Zwavelpoort gehou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

41 Kommentare

jongste oudste gewildste
Andres Basson

Ek het nie meer woorde nie. My innige simpatie aan die familie.

Dinkbietjie

Hulle slaan toe waneer daar baie geld is ? hoe het hulle geweet dis daar ? en dit nog op die regte tyd stip . Begin soek by die wat daar werk en weet wat gaan daar aan . Jammer vir die verlies , maar mense is agterlosig waar hulle weet hulle het groot bedrae geld by hulle . Weet julle nie wat is E.F.T. nie ? ELECTRONIC FUND TRANSVER .

andre

wat maak n mens met so baie geld in n kluis by jou huis. jy maak mos nou van jouself n teiken vir sulke gemors.

Pietsnot

Andre jy slaan die spyker op die kop en praat die waarheid .

Annemarie

Sekuriteits wagte is seker geld in die hand gestop. Hoe moet jy jou naaste liefhe as dit so gaan. Ek behandel elke dag almal met respek…..genade en net mooi niks word aan die saak gedoen nie. Ons kan almal mooi saamstaan en in n pragtige land bly…..maar ek is bevrees die regering is die grootste rassiste….