Brittanje, SA bereik post-Brexit-ooreenkoms

(Argieffoto: Tim Ierland, Xinhua)

Suid-Afrika, asook vyf ander lande in suidelike Afrika het ʼn nuwe handelsooreenkoms met Brittanje bereik wat bilaterale handel tussen die ses lande en Brittanje sal bepaal nadat Brittanje die Europese Unie (EU) verlaat.

Suid-Afrika se minister van handel en nywerheid, Ebrahim Patel, het gesê Suid-Afrika, Lesotho, Eswatini (vantevore Swaziland), Namibië, Botswana en Mosambiek het die ooreenkoms met Brittanje bereik.

Die ooreenkoms geld of Brittanje nóú ʼn ooreenkoms met die EU oor sy onttrekking aangaan en of daar geen Brexit-ooreenkoms voor die sperdatum bereik kan word nie.

Patel het gesê Suid-Afrika onderhandel al die afgelope twee jaar met Brittanje nadat hy aangekondig het dat hy die EU gaan verlaat, in ʼn poging om enige ontwrigting van die land se uitvoere te voorkom.

Die nuwe ooreenkoms is soortgelyk aan die vorige een oor tariewe, kwotas, bepalings oor oorsprong, asook gesondheid- en veiligheidsregulasies.

“Ons is dankbaar dat wat ook al die uitkoms [van Brexit] is, ons handelsverhouding met die Verenigde Koninkryk sonder onderbreking kan voortgaan. Dit is belangrik vir duisende Suid-Afrikaanse werkers wie se inkomste afhang van dié handel, asook vir die beleggers wat Suid-Afrika gebruik as uitvoerbasis na Brittanje en die res van die wêreld,” het Patel gesê.

Brittanje was in 2018 die vierde grootste bestemming vir Suid-Afrikaanse uitvoere en bilaterale handel tussen die twee lande het meer as US$9,3 miljard (nagenoeg R135 miljard) beloop.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

3 Kommentare

Hendrik ·

Hoe kan SA met Britanje besigheid doen as hulle BBBEE telling nie reg is nie. Ongehoort!

Leon ·

Ek neem aan dit is ‘n eensydige ooreenkoms waar Brittanje die minerale vat, niks vir dit betaal en ons alles moet invoer en hulle niks van ons af invoer na die VK nie.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.