DA – Nóg ʼn mosie van wantroue aan vooraand van verkiesing

Mmusi Maimane en Helen Zille.

Aan die vooraand van ʼn potensieel verdelende interne verkiesing vir die DA is ʼn interne mosie van wantroue in ʼn leiersfiguur van die party net-net afgeweer deurdat dit verbied is. Dit terwyl ʼn paneel wat die DA se toekomsopsies moet ondersoek, aanbeveel het dat partyleier Mmusi Maimane bedank.

Die mosie van wantroue sou Maandagoggend in die DA-koukus van die Kaapse metro-streek dien en is ingedien deur Courtney van Wyk, senior DA-stadsraadslid van Delft, teen JP Smith, burgermeesterskomiteelid vir veiligheid en sekuriteit. Van Wyk voer aan Smith saai verdeeldheid in die party en dat hy mense opstook om kollegas uit te werk.

Die Wes-Kaapse leier van die DA, Bonginkosi Madikizela, het die mosie van wantroue egter verbied en gesê daar is ander maniere om probleme op te los. Dit is ʼn ratverwisseling vir Madikizela, wat saam met Smith aan die voorpunt was van die DA-mosies van wantroue in Patricia de Lille as burgemeester van Kaapstad.

Sowel Madikizela as Smith word beskou as hegte ondersteuners van die voormalige DA-leier Helen Zille, wat haarself nou verkiesbaar gestel het as voorsitter van die DA se federale raad.

Dié potensieel verdelende verkiesing vind die komende naweek plaas.

Tony Leon. Foto: Reint Dykema

Die DA-verkiesing se reëls is anders as die van ander politieke partye. Elkeen van die ongeveer 180 stemgeregtigdes moet hul keuse in rangorde van een tot drie stel en dit word dan verreken om die wenner aan te wys – dis nie bloot ʼn geval dat die een wat die meeste mense se eerste keuse is, wen nie.

Die stelsel is juis ontwerp om verdeeldheid teen te werk, maar verdeeldheid is deesdae een van die eienskappe waarmee die DA skynbaar sinoniem geword het.

In ʼn vertroulike verslag wat die komende naweek voor die party se federale raad dien, maak paneellede Ryan Coetzee (voormalige DA-strateeg), Tony Leon (voormalige DA-leier) en die sakeman Michiel le Roux verskeie aanbevelings, onder meer dat Maimane bedank. Hy weier egter om dit te doen.

Maimane is in die spervuur, onder meer oor die koste van die huis waarin hy in Kaapstad woon en ʼn motor wat hy gebruik het en wat deur die maatskappy Steinhoff geborg is. Hoewel ʼn ondersoek deur die DA se tesourier, dr. Dion George, bevind het alles is daarmee in orde, is daar na bewering nóg modder wat eersdaags na Maimane geslinger kan word – ʼn teken van ʼn party in krisis.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Mark

Die DA se probleem is dat mense soos JP Smith hoog aanbeveel word deur die party maar min mense na die party gebring het. Hulle almal het in die botter geval en die mense uitgewerk wat die party se nommers in gebring het.

An

Hierdie dag moes voor die verkiessing gekom het.. ek hoop regtig Moesie kry die boodskap

Gewese DA ondersteuner

Zille is maar die enigste een met die regte pille!

Anti DA

Die DA/anc light is besig om dood te gaan net soos die np gesneuwel het , en ek voel goed daaroor.

Irene

Ag toggie hier begin hul weer met a gemors