Floyd Brink (Foto: Facebook / City of Johannesburg)
Die DA gaan hom weer tot die hof wend nadat Floyd Brink verlede week as Johannesburg se stadsbestuurder heraangestel is ondanks ʼn onlangse beslissing van die Johannesburgse hooggeregshof dat sy aanstelling in Februarie onregmatig was.
“Ons sal dit nie duld nie,” sê die opposisieparty nadat Brink verlede Woensdag tydens ʼn geslote raadsvergadering genoeg stemme van die ANC, EFF en Patriotic Alliance gekry het om weer sy pos as stadsbestuurder in te neem.
Die raad se voorheen aanvaarde verslag om Brink as stadsbestuurder aan te stel is tydens die vergadering weer ter tafel gelê én aanvaar.
Belinda Kayser-Echeozonjoku, die DA se koukusleier in Johannesburg, sê die verslag is summier aanvaar ondanks ʼn waarskuwing van die speaker én die hoofbestuurder aan raadslede dat Brink se heraanstelling op minagting van die hof neerkom.
“Hulle het verder gegaan en die kwessie vererger met ongeregverdigde aanvalle op die regbank,” sê Kayser-Echeozonjoku.
“Ons het by verskeie geleenthede gewaarsku dat die uitvoerende en die wetgewende arm van die raad ons inwoners in die steek gelaat het, en dat die heraanstelling van Floyd Brink die kwessies wat die stad in die gesig staar net verder sal vererger.
“Die DA het die onregmatige verslag verwerp met die minagting wat dit verdien toe dit voor die raad gekom het, en ons gaan voort om hierdie heraanstelling teë te staan. Ons sal nie daarvoor staan nie.
“Die DA staan vir die oppergesag van die reg en sal nie betrokke wees by onreëlmatige, onwettige en ongrondwetlike besluite wat in die raad deur die ANC-EFF-PA-oordeelsdagkoalisie geneem word nie,” sê Kayser-Echeozonjoku.
Die Joburg-krisisalliansie sê intussen hy is ook woedend oor Brink se “geheimsinnige heraanstelling” aangesien die heraanstelling nie op die agenda vir die raadsvergadering verskyn het nie.
“Hoekom is die regerende koalisie in die Stad Johannesburg se raad so desperaat om Floyd Brink as die stadsbestuurder te hê?” wil die alliansie weet.
“Die alliansie is verstom dat die raad dink hy kan sy blatante vertrapping van prosedures regstel deur sy eie onwettige gedrag terugwerkend te bekragtig.
Die Joburg-krisisalliansie glo dat die aanstelling van die stadsbestuurder – ’n deurslaggewende pos – doelbewus uitgerek is ten koste van stadsbestuur om die huidige koalisieregering in staat te stel om sy voorkeurkandidaat in die pos te kry.
Die alliansie is ook vies oor die Stad Johannesburg se reaksie op die Johannesburgse hooggeregshof se besluit om sy aansoek om appèl af te keur. “Die raad hou dalk nie van die hof se weiering van sy aansoek om verlof tot appèl nie maar die manier om dit te hanteer is om ʼn aansoek om verlof tot appèl by die appèlhof in te dien, nié om bloot in die openbaar aan te kondig dat die hof verkeerd was nie, die uitspraak af te wys en die raadsprosesse te kaap nie.
“Die arrogansie – en desperaatheid om ʼn begunstigde kandidaat aan te stel, asook ʼn aanval op die regbank – behoort groot kommer by inwoners van die stad te wek. Dit laat ʼn paar baie ontstellende vrae ontstaan. Is daar twyfelagtige kontrakte wat op ondertekening van die stadsbestuurder wag? Is daar twyfelagtige betalings wat wag op aftekening wat nie kan wag nie? Is daar verreikende ondersoeke in die stadsbestuurder se kantoor wat teruggetrek moet word? Waarom is die raad so desperaat om Floyd Brink te behou ten spyte van ʼn duidelike hofuitspraak?”
TIA
Die ANC laat hom nie deur ‘n Hof voorskryf nie.
Hy laat hom wel deur die hof voorskryf dis egter net wanneer dit hom pas
Ja hulle steur hulle nie daaraan nie, ignoreer dit eenvoudig
Nee die anc het nie ore nie luister net nie wil net maak soos hulle wil en die howe is bang vir eff en anc daarom word hulle niks gedoen nie baie onregverdig regtig
Dis al waarvoor die DA goed is…alewig hof toe hardloop. Wiè betaal hierdie hof kostes? Want waragtig,niemand kan niks sè of doen (ander partye),dan hardloop hulle hof toe nie. En met min of geen sukses nie.
Vicky, ek bedoel dit nie lelik nie, maar as jywaaragtig nie iets beters te sê het nie, bly liewers stil. Het jy die artikel in diepte gelees? Dis waarvoor opposisie daar is, as die regbank ignoreer word, kan hulle mos nie stilbly nie? Dan is hulle mos ook landsverraaiers? of hoe.
cANCer het ‘n doodsinspuiting nodig……………die stembus moet praat!!!