Dr. Nandi vertel in trane hoe sy deur Bester ‘ontvoer is’

Dr. Nandipha Magudumana (Foto: Becker Semela/GroundUp)

Deur Daniel Steyn en Becker Semela, GroundUp

Die veroordeelde moordenaar, Thabo Bester, se vriendin, dr. Nandipha Magudumana, het Dinsdag tydens haar borgtogaansoek in die landdroshof in Bloemfontein in trane gesê Bester het haar ontvoer en teen haar wil na Tanzanië geneem.

Die staat het haar stelling egter betwis en voer aan Magudumana het aktief aan Bester se ontsnapping deelgeneem. Die staat het aangedui dat hulle haar borgtog teenstaan.

Magudumana, wat teregstaan op aanklagte wat verband hou met Bester se ontsnapping uit die tronk in Mei 2022, doen tans aansoek om borgtog. Sy is op 7 April vanjaar in Tanzanië saam met Bester in hegtenis geneem en is sedert 13 April in aanhouding by die Bizzah Makhate-gevangenis in Kroonstad in die Vrystaat.

In ’n beëdigde verklaring, voorgelees deur haar regsverteenwoordiger, adv. Frans Dlamini, het Magudumana gesê dat sy op 17 Maart vanjaar deur Bester “opdrag gegee en beveel is” om in ’n voertuig te klim en na ’n onbekende plek te ry.

“Ek het geweier, maar hy het my in die voertuig ingedwing. Ek het onder die druk geswig weens die dreigemente wat hy aan my gerig het,” het Magudumana in haar beëdigde verklaring gesê.

Sy het aan die hof gesê dat sy ten tyde van haar inhegtenisneming R50 000 per maand verdien het en dat sy bates ter waarde van R1 miljoen het. Sy het aangedui dat sy borgtog van R10 000 sal kan bekostig.

Die ondersoekbeampte in die saak, lt.kol. Tieho Flyman, het egter gesê hy betwis die bewering dat sy deur Bester ontvoer is.

Volgens Flyman het Magudumana self gery om Bester ná sy ontsnapping in KwaZulu-Natal te gaan haal, dat hulle saam in ’n huurhuis gebly het, dat Magudumana sowel as Bester die huurooreenkoms vir daardie huis onderteken het en dat die egpaar saam gereis en gebly het in die maande ná die ontsnapping.

Flyman het gevra waarom Magudumana nie ’n ontvoeringsaak teen Bester geopen het terwyl hy in die tronk was nie. Hy het ook melding gemaak van Magudumana se gedrag tydens haar vorige hofverskyning (op 8 Augustus) met Bester, waartydens die twee heel danig met mekaar was.

“As daar gekyk word na hoe die applikant betrokke is, en die rol wat in die ontsnapping gespeel is, is daar geen bewys dat sy in enige stadium gedwing of op enige manier gedreig is nie,” het Flyman aangevoer.

Flyman het aan die hof gesê dat Magudumana volgens polisie-ondersoeke in die dae voor die ontsnapping in Bloemfontein gebly het en twee liggame op bedrieglike wyse van staatslykhuise geëis het. Een van die liggame is in Bester se tronksel aan die brand gesteek terwyl die ander in ’n rivier in Bloemfontein gestort is.

Terwyl die staatsaanklaer, Sello Matlhoko, Flyman se beëdigde verklaring voorgelees het, het Magudumana, wat in die beskuldigdebank gesit het, haar kop geskud.

‘’n Poging om verhoor te ontduik’

Thabo Bester en sy vriendin, dr. Nandipha Magudumana vir die eerste keer saam in die hof. (Foto: Skermgreep)

Magudumana het aan die hof gesê dat sy borgtog moet kry. Sy het gesê dat sy van plan is om onskuldig te pleit op die aanklagte teen haar wat insluit hulpverlening tydens ’n ontsnapping uit aanhouding, die skending van liggame en bedrog.

Sy het gesê sy stel nie belang daarin om die land te verlaat nie en dat sy geen reisdokumente het nie aangesien haar paspoort steeds in die polisie se besit is.

Sy het gesê as sy op borgtog vrygelaat word, sal sy by ’n vriend in Sandton bly. Sy het aangevoer dat sy die ouer van twee minderjarige kinders is en vir hulle sorg. Sy het gesê sy sal nie probeer om haar verhoor te ontduik of met staatsgetuies in te meng nie.

Maar Flyman het in sy beëdigde verklaring gesê Magudumana het “aansienlike aansporing om haar verhoor te ontduik”. Hy het gesê benewens die langtermyn-gevangenisstraf wat haar in die gesig staar as gevolg van die ontsnappingsaanklagte, minstens ses kriminele sake wat deur lede van die publiek teen haar aanhangig gemaak is, haar ook in die gesig staar. Hierdie sake hou verband met bedrog van tussen R150 000 en R15 miljoen.

Flyman het gesê Magudumana het in Maart saam met Bester landuit gevlug, wat daarop dui dat sy ’n vlugrisiko is.

Sy het die polisie “doelbewus ontduik” toe sy in Mei 2022 ’n bevel van die Pretoriase hooggeregshof aangevra het dat die liggaam wat in Bester se sel gevind is aan haar terugbesorg moet word en dat die polisie verbied word om haar te teister, het hy gesê.

Flyman het gesê dat Magudumana in daardie hofstukke gelieg het en dat haar prokureur ’n valse prima facie-hofbevel geskep het dat die liggaam wat in Bester se sel gevind is, aan Magudumana vrygestel word.

Flyman het gesê haar kinders word deur Magudumana se man versorg en hulle het haar sedert sy in gevangenis is, nog glad nie besoek nie. Hy het gesê telefoonrekords van die tronk toon dat sy haar man nog net een keer gebel het.

Die borgtogaansoek sal op Woensdag voortgesit word.

• Hierdie berig is oorspronklik op GroundUp gepubliseer en word met vergunning op Maroela Media gebruik.