Drie Muldersdrift-kleinhoewes in een nag geteiken

Argieffoto

Argieffoto

Die polisie ondersoek drie misdaadvoorvalle wat binne net meer as vyf uur op kleinhoewes in die Muldersdrift-gebied in Gauteng plaasgevind het.

Kapt. Appel Ernst, woordvoerder van die polisie, het gesê die eerste voorval het Woensdag omstreeks 20:00 op ʼn kleinhoewe in Driefontein plaasgevind toe ʼn 89-jarige man ʼn geluid buite die studeerkamer van sy huis gehoor het.

“Hy het gesien hoe twee mans probeer om ʼn skootrekenaar deur ʼn gebreekte venster te verwyder. Die man het een van die verdagtes met sy kierie geslaan en die verdagte het ʼn vuurwapen op hom gerig,” het Ernst gesê. “Daarna het die verdagtes op die vlug geslaan. Geen skote is afgevuur nie en niks is gesteel nie.”

Sy het gesê die polisie ondersoek ʼn saak van poging tot roof.

Slegs ʼn halfuur later was daar ʼn tweede misdaadvoorval op ʼn kleinhoewe in dieselfde gebied. Volgens Ernst was ʼn 36-jarige werker saam met vriende by sy huis op die kleinhoewe toe hy gehoor het hoe die deur oopgestamp word. ʼn Gewapende man het ingekom en die groep se selfone geëis.

“Nog twee verdagtes het ingekom en die slagoffers gedwing om op die vloer te lê. Hulle hande en voete is vasgebind en hulle is aangerand. Die verdagtes het met kontant en verskeie selfone gevlug,” het Ernst gesê. Sy het gesê die slagoffers is nie ernstig beseer nie. ʼn Saak van huisroof word ondersoek.

ʼn Paar uur later, omstreeks 01:15, het nog ʼn kleinhoewe in die Elandsdrift-gebied onder rowers deurgeloop. Volgens Ernst was een van die werkers en sy vrou op die kleinhoewe aan die slaap toe hulle wakker geskrik het van ʼn venster wat breek.

“Die vrou het gesien hoe ʼn hand in die huis ingesteek word en sy het geskree. Die verdagte het daarna ʼn skoot afgevuur en die man is in sy been gewond,” het Ernst gesê. Die drie verdagtes, waarvan een gewapen was, het die vrou gedwing om die deur oop te maak. Hulle het ʼn televisiestel, selfone en ʼn skooltas geroof voordat hulle op die vlug geslaan het.”

Ernst het gesê ʼn saak van huisroof en poging tot moord word ondersoek. Niemand is nog in verband met enige van die drie voorvalle in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

10 Kommentare

jongste oudste gewildste
Help

Muldersdrift moet hulle eie ‘kommando’ of ‘veiligheidspan’ op die been bring. Dit kan mos nie net so aangaan nie? Hulle word daagliks geteiken. Moboliseer ‘n bietjie .. werk saam met sekuriteitsfirmsas en staan vas teen hierdie misdadigers.

Connie

Ek is so kwaad dat ek nie woorde het nie.

Jaco

Eers verloor ek my werk deur regstellende aksie, toe word BEE ingestel om my firma (wat ek self op die been gebring het) en my as mens verder te onderdruk en van nog inkomste te ontneem, derdens word my belasting geld gemors en asof dit nie genoeg is nie, word daar by ons ingebreek en dit waarvoor ek bloed gesweet het ook beroof!! Waar gaan dit eindig? Is dit die resultaat van n “we want, and we demand” mentaliteit? South Africa is for sure a failed state!!!

Issie

Ek bly ook in die omgewing. Dis skrikwekkend hoeveel immigrants daar werk en bly sonder enige paspoort of werkspermitte. Daar word by ons voertuie ingebreek om te steel, en ons mag niks doen nie. Hoeveel moet ons nog hanteer!!!!!

Willie

Wens Trump was hier om n paar mure te bou!