Drie Pukke geskors, vervolg ná vuisgeveg

‘n Skermgreep uit die beeldmateriaal.

Drie manstudente van die Noordwes-Universiteit se Potchefstroomkampus verskyn weer later vandeesmaand in die hof op die dorp, nadat hulle ná ʼn wilde geveg in hegtenis geneem is.

Enrico Robbertze, Andrew Mc Neill en Ruan van der Heever is aangekla van aanranding met die doel om ernstig te beseer ná die bakleiery op 17 Julie buite ʼn kuierplek op die Bult, het kol. Adéle Myburgh, polisiewoordvoerder in Noordwes, gesê.

Die drie is glo inwoners van die Caput-manskoshuis.

Myburgh het gesê die drie mans het reeds verlede Maandag in die hof verskyn en is op borgtog van R2 000 elk vrygelaat.

Verskeie slagoffers is ernstig beseer in die voorval wat op kringtelevisie opgeneem is. Die beeldmateriaal vorm deel van die polisieondersoek, het Myburgh gesê.

Louis Jacobs, woordvoerder van die universiteit, het gesê die drie manstudente wat na bewering by die voorval betrokke was, is voorlopig geskors uit die koshuis waar hulle woon, asook vanaf die kampus.

Die skorsing geld tot die ondersoek en die dissiplinêre verhoor rakende die klagtes van wangedrag afgehandel is. Jacobs het gesê die universiteit probeer die proses so vinnig moontlik afhandel.

“Enige wangedrag of optrede deur enige van ons studente, op en vanaf enige van ons kampusse, wat nie strook met die waardes en etos van die NWU nie, word ten sterkste veroordeel. Daar sal ooreenkomstig die dissiplinêre prosesse van die universiteit opgetree word teen studente wat hulle hieraan skuldig maak,” het Jacobs by navraag gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
ProotGraat

Nog drie Careltjies. Ai ai. So onndodig.

Mel

Hierdie kinders wat nie hulle humeur in toom kan hou nie! Een klein geskil en dit kos hulle hulle toekoms.
So onnodig.

Fanie

Jaag hulle weg. Hoop Pukke gaan hulle skors. Hulle mos ouers se geld en is nie ernstig hulle studieveld en toekoms nie.

Niklaas

Daar word gesê “brandewyn het nie brieke nie”. Ek is seker hierdie 3 kerels was nie vreeslik nugter nie en die geveg het ontstaan oor ‘n onbenulligheid. Drank maak mens mos slim EN sterk . Maar daar word volwassenheid van volwassenes verwag. Sonie is daar ‘n prys te betaal en hul kanse om daar graad te vang is dalks gering as hul skuldig bevind word.

Katryn

Wie het die moeilikheid begin die wat pakgekry het of die wat uit gedeel het