Dwaalkoeël by begrafnis tref inwoner van ouetehuis

Kebby Maphatsoe word ter ruste gelê. (Foto: Departement van militêre veterane/Facebook)

’n 75-jarige inwoner van ’n ouetehuis in Westdene in Johannesburg is Sondagmiddag deur ’n dwaalkoeël in die been getref, terwyl sy in haar tuin gesit het. Die koeël was glo afkomstig van die begrafnis vir ’n MK-veteraan wat by die begraafplaas naby die ouetehuis gehou is.

Nóg ’n koeël het boonop deur ’n slaapkamervenster in die naburige Montgomery Park gebars en ’n bejaarde man (87) op sy bed met enkele meters gemis.

Dié skote is klaarblyklik by die begrafnis van die nou ontbinde Umkhonto we-Sizwe militêre veterane-vereniging (MKMVV) se leier, Kebby Maphatsoe, afgevuur.

Honderde patrone is glo by die Westpark-begraafplaas in die lug afgevuur waar talle ondersteuners Sondag van Maphatsoe afskeid geneem het.

“Altesame 236 leë koeëldoppies is tot dusver by die begraafplaas opgetel,” het DA-LP James Lorimer Woensdagoggend aan Maroela Media gesê.

Lorimer is Maandag deur ’n plaaslike DA-raadslid in kennis gestel dat Margaret Holloway, ’n inwoner van die Eeufees Oord-ouetehuis, die vorige dag in die hospitaal opgeneem is nadat sy deur ’n dwaalkoeël in die been getref is. Daar word glo vermoed dat die koeël dié van ’n AK47 is.

Volgens Lorimer het verskeie inwoners van omliggende buurte intussen na vore gekom en gesê hulle het talle outomatiese geweerskote Sondagmiddag gehoor. Die skote het na bewering tot 30 minute aaneen afgegaan.

Een van die dwaalkoeëls wat in die woonbuurte om die begraafplaas gevind is. (Foto: Verskaf)

Lorimer bestempel die skietery as “pure wetteloosheid”.

Brig. Vish Naidoo, nasionale woordvoerder van die polisie, het aan Maroela Media bevestig dat klagte in verband met Maphatsoe se begrafnis aanhangig gemaak is.

Die klagte het aanvanklik gehandel oor die groot aantal roubeklaers wat die begrafnis bygewoon het. Klagte oor die oortreding van die Vuurwapenwet is eers later ingedien.

“Ons het later berigte ontvang dat ’n 75-jarige vrou in haar been geskiet is, na bewering deur een van die patrone wat tydens die begrafnis afgevuur is. ’n Verdere saak van poging tot moord word nou ook ondersoek,” sê Naidoo.

Luidens berigte kan die koeël nie uit Holloway se been verwyder word nie en die bejaarde is intussen uit die hospitaal ontslaan. Sy verkeer in baie pyn, berig News24.

Polisie sit hande gevou

Lorimer vertel daar was glo verskeie senior polisiebeamptes by die begrafnis teenwoordig, maar hulle het glo niks gedoen toe daar wild en wakker in die lug geskiet is nie.

Om sake te vererger, het polisiebeamptes van die Sophiatown-polisiestasie glo nie gereageer toe Holloway deur die dwaalkoeël getref is en die ouetehuis die polisie ontbied het nie. Dié inligting kon egter nog nie bevestig word nie, aangesien Maroela Media sedert Dinsdag sukkel om die ouetehuis-bestuur in die hande te kry.

Volgens Lorimer is dit al vir ’n paar jaar algemene gebruik dat skote tydens begrafnisse by die Westpark-begraafplaas afgevuur word. Talle hooggeplaastes word by die begraafplaas ter ruste gelê. Die skietery gebeur egter glo veral wanneer bendelede ter ruste gelê word.

Plaaslike DA-raadslede het reeds verskeie klagte in dié verband by die polisie en metropolisie ingedien. Volgens Lorimer word daar egter geen poging aangewend om die probleem aan te pak nie.

“Indien die polisie nie die mannekrag, organiseringsvermoë of die moed het om hierdie [skietvoorvalle] stop te sit nie, kan hulle dalk net inwoners waarsku wanneer bendelede of senior ANC-amptenare ter ruste gelê word, sodat hulle onder die bed of in die kas kan wegkruip,” het Lorimer tong in die kies gesê.

Lorimer doen ’n beroep op die polisie om diegene wat Sondag skote afgevuur het, in hegtenis te neem.

Shots fired as #KebbyMaphatsoe's casket was brought outside. #RIPKebbyMaphatsoe pic.twitter.com/4ciIzm030g

— Moagi The Great (@Chris_Moagi) September 5, 2021