Eerste voorstelle vir grondwetwysiging oor grond

land-lugfoto-grond-landbou

Foto: Magda Ehlers/Pexels.com

Die eerste voorstelle vir die verandering van die Grondwet om onteiening sonder vergoeding te vergemaklik, is tydens sittings van die tersaaklike ad hoc-komitee in die parlement ingedien.

Dit is nog ‘n lang proses wat voorlê, met geen aanduiding of enigeen die meerderheid van twee derdes wat vir ‘n grondwetwysiging benodig word, gaan behaal nie.

Terwyl die DA (met 84 LP’s uit 400), die IVP (met 13 LP’s) en die VF Plus (met 10 LP’s) glad nie te vinde is vir grondwetwysigings nie, is dit duidelik dat die ANC (met 230 LP’s) en die EFF (met 44 LP’s) skerp verskil oor die aard en bewoording van ‘n wysiging, en dat dit nie maklik gaan wees om ‘n voorstel daar te stel wat twee derdes steun gaan trek nie.

Die parlement se regsafdeling het uitgewys dat daar twee tipes onderafdelings aan art. 25 is. Eerstens is daar subartikels 1, 2 en 3 wat huidige regste beskerm, en dan is daar byvoorbeeld artikel 4 wat transformatief bewoord is.

‘n Voorstel van die kant van die parlementêre regsdienste is dat ‘n hof mag bevind dat ‘n nul-vergoeding ‘n regverdige en geregverdigde vergoeding verteenwoordig, of dat geen vergoeding uitbetaal word nie vir eiendom wat op grond van die rassediskriminasie van die verlede (soos die Groepsgebiedewet) bekom is.

Ook subartikel 7 van art. 25, wat die regstel van ongeregtighede slegs terugneem tot 1913 as afsnydatum, en dus alle grond wat voor daardie datum (die instel van die Naturelle Trust- en Grondwet) op rassegronde ontneem is, van grondhervorming uitsluit, kan heel moontlik in die slag bly.

Maar waar die EFF (by monde van die EFF-onderleier, Floyd Shivambu) basies die onteiening van enige grond sonder vergoeding wil hê, is die ANC (by monde van sy senior LP’s dr. Mathole Motshekga en Mandla Mandela) versigtiger en minder lus vir wat basies op ‘n sosialistiese model neerkom.

Swart boere het die EFF trouens in die komitee getakel omdat hul beleid onder meer sou beteken dat swart private boere hul eiendom kwyt sal wees.

Wat die ANC se voorstel is, is tans uiters onduidelik te midde van gerugte van verdeeldheid. Die ad hoc-komitee sit sy vergaderings volgende week voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

13 Kommentare

jongste oudste gewildste
Jan Alleman

Die land het eers in 1910 tot stand gekom. Om regstelling verder as dit terug te neem is onsinnig en gaan in groot konflik ontaard.

KO

Ontnugterend om wakker te skrik na my RWC baba-las, en te besef ek is nog steeds in Suid-Afrika en nie in utopia nie.

chrisjan

Deel eers ALLE staatsgrond uit.Dis al meer as genoeg.

Johanna Botha

Anc gasn die ding ook opmors !

Bosvark

Soos Zimbabwe, almal het grond maar geen kos. Dit gaan lei tot n tragedie.