Enkele verkiesingsvoorvalle reeds aangemeld

Die polisie is op ‘n gereedheidsgrondslag om te verseker die verkiesing verloop vry en regverdig. (Foto: SA Polisie)

Terwyl enkele verkiesingsverwante voorvalle reeds aangemeld is, sê die polisie hy is gereed om Maandag ʼn fyn oog te hou om te verseker die plaaslike verkiesing verloop vlot.

Betogings is in sommige gebiede aangemeld en voorvalle van stempunte wat deur ontevrede kiesers toegesluit is, is reeds aangemeld.

Die minister van polisie, Bheki Cele, was Sondagaand in KwaZulu-Natal om die polisie se gereedheid na te gaan en was ʼn dag tevore in Mpumalanga om dieselfde te doen. Daar is veral gekyk na gebiede wat as moontlike brandpunte geïdentifiseer is.

KwaZulu-Natal het 4 006 stempunte en 128 hiervan is in die hoërisikokategorie geplaas. Die minister sê hy is tevrede dat maatreëls ingestel is om die veiligheid van kiesers, amptenare van die Onafhanklike Verkiesingskommissie (OVK) en die publiek te verseker.

“Bykomende polisiebeamptes is voor die verkiesing in die gebied ontplooi. Wetstoepassingsowerhede sal ook nou saam met die weermag werk om ons magte te versterk.

“Die provinsies het omvattende planne saamgestel, gerig deur intelligensiegedrewe ontleding, en dit gee my die vertroue dat die planne sal beteken kiesers kan hul stemme vrylik uitbring, met min tot geen ontwrigting nie,” sê Cele.

Die vier provinsies – dit sluit ook die Oos- en Wes-Kaap in – wat vroeër as prioriteitsgebiede geïdentifiseer is, is volgens Cele onder “slot en grendel”.

In gebiede waar OVK-amptenare weens veiligheidskommer of dreigemente van inwoners nie hul werk kan doen nie, is polisiebeamptes opgelei. Hulle sal op ʼn gereedheidsgrondslag wees om sake by die stempunte oor te neem, indien nodig.

“Dit is reeds die geval in die Ugu-distrik in KwaZulu-Natal, waar verkiesingsverwante geweld uitgebreek en ʼn polisiebeampte by Mistake Farm in die been gewond is.”

Cele sê al fokus die polisie in hierdie stadium daarop om die stemproses te beveilig, sal ander misdade nie oorgesien word nie.

Die verhoogde ontplooiing sal geld tot ná 4 November, wanneer die uitslae na verwagting bekend gemaak sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
Sarel

Vry & Regverdig???
Onder Polisiebewaking???

Irene

Niks in ons land sal ooit weer in vrede geskied nie.

Harley Davidson

Ek raak bang as ek polisie en intelegensie in een sin sien want nie een bestaan nie.

Nie Verbaas

Hoe kan Cele veiligheids maatreëls nagaan as hy geen idee van polisiëring het nie?

Andréas

Asseblief mense, jul moet gaan stem?
Motiveer dié in jou gesin, familie en vriendekring. Daarom is dit ‘n vakansiedag. Dis in werklikheid jou plig en word nodig geag ten einde jou mening vir ‘n beter toekoms nie net te lug, maar werklik te kan maak. Hiér tel die gesegde, “Die Pen is beter as die Swaard”

Stem jy nie…
Dis Draad sit. Jou kommentaar en mening oor ons land en sy mense sal absoluut geen grondige waarde hê. Net lug in ‘n oop en leë blik.
Verraad teen jouself en dié naaste aan jou.
Sonder rugraat…