Familie sê daar is geen tienling nie

Die 37-jarige Gosiame Thamara Sithole van Tembisa het vandeesweek glo aan 10 babas geboorte geskenk. Langs haar sit haar man, Tobogo Tsosetsi. (Foto: Thobile Mathonsi/African News Agency/IOL)

Die Tsotsetsi-familie het Dinsdag by hul familiehuis in Tembisa vergader. Uitgebreide familielede en nabye vriende het ook die byeenkoms bygewoon en ʼn verslag gekry Gosiame Sithole se kêrel, Tebogo Tsotetsi.

Tebogo het bevestig dat hy nog nie die tienling gesien het nie en op sy meisie se inligting staat gemaak het wat hom gebel het om te sê die tienling is gebore. Hy het ʼn paar keer probeer om sy meisie en die babas te besoek, maar sy wou nie sê waar hulle is of wat die toestand van die babas is nie.

Maroela Media het vroeër berig daar hang talle vraagtekens oor die geboorte van ’n tienling in Gauteng wat glo ook ’n nuwe Guinness-wêreldrekord laat spat het. Die nuus dat die 37-jarige Gosiame Thamara Sithole van Tembisa op 7 Junie aan sewe seuns en drie dogters geboorte in “’n Pretoriase hospitaal” geskenk het, het die volgende dag soos ’n veldbrand versprei. Die storie is deur Pretoria News gebreek en spog met foto’s van ’n hoogswanger Sithole by haar kêrel, Tobogo Tsosetsi. Dit het egter geblyk dat niemand, selfs nie die regering nie, geweet het waar om dié egpaar en hul spruite op te spoor nie. Daar is ook nooit enige foto’s van die babas gepubliseer nie.

“Die huidige onsekerhede en gesprekke deur die publiek oor die tienling is ʼn groot kommernis vir die familie, veral in die lig dat daar geen bewyse is dat die tienling wel bestaan buiten telefoniese en WhatsApp-boodskappe van die ma nie,” het die familie nou in ʼn verklaring gesê.

Die familie het tot die besluit gekom dat geen tienling gebore is nie, tot ander inligting ontvang word. Hulle vra om verskoning vir enige ongerief en verleentheid.

Die familie het gesê hulle waardeer en erken die ondersteuning van Piet Rampedi, redakteur van die Pretoria News wat die storie oor die tienling gebreek het, tydens die swangerskap laat verlede jaar.

“Tebogo Tsotetsi het Pretoria News en Piet Rampedi in kennis gestel van die tienling, gebaseer op inligting wat hy van sy meisie ontvang het. Die familie het nooit beweer dat hulle die tienling gesien het nie en hulle het staat gemaak op die telefoniese en WhatsApp-bevestigings van die meisie,” lui die verklaring.

Die familie het kontak verloor met Gosiame Sithole, die ma van die beweerde tienling, en omdat haar selfoon afgeskakel is, het hulle ʼn saak van ʼn vermiste persoon aanhangig gemaak. Pogings om haar en die babas te sien was alles tevergeefs.

“Die saak bly sensitief en kommerwekkend, veral omdat ons nie weet waar Gosiame haar bevind nie. Ons doen ʼn beroep op die publiek om nie verder enige geld te skenk of geld in enige bankrekening in te betaal vir die tienling nie.”

Die familie waardeer die publiek se belangstelling en ondersteuning vir die tienling, maar met geen bewyse van hul bestaan nie, glo die familie dit is in die belang van almal om tot die slotsom te kom dat hulle nie bestaan nie – totdat daar anders bewys kan word.

“Ons sal nou ons aandag daarop toespits om Gosiame op te spoor terwyl ons bid vir haar veilige terugkeer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

63 Kommentare

jongste oudste gewildste
Snowball

Hoe lieg ‘n mens oor so iets?

anniekiewiet

Die familie se woordvoerder wat met ander media gepraat het, moet maar uitsluitsel gee. Die kêrel wat langs haar op die foto sit, kan nie nou net skouers optrek nie. Maar ek glo lesers hier sal begrip hê vir die familie se bekommernis en geen afbrekende kommentare plaas nie.

Nie Verbaas

Wys mens hoe ver hulle dink, asof dit iets is wat mens kan wegsteek.

Eerlik

Daar was alreeds soveel bydraes gemaak vir hierdie “tienling”. Pa is werkloos, en ek is seker die Ma ook. Indien hierdie storie wel n klug is hoop ek die hele familie word aangekla vir bedrog!

Frikkie

wonder waar is die miljoen, gaan die skenker dit nou terug eis?