Fase 6 nou eers weer later ingestel

(Argieffoto: GCIS)

Fase 6-beurtkrag sal nou eers later Vrydag ingestel word nadat Eskom sy noodreserwes genoegsaam kon aanvul.

Fase 6-beurtkrag sou Vrydag van 05:00 af ingestel word, maar volgens Eskom sal dit nou eers van 16:00 tot 22:00 geld.

Fase 4-beurtkrag word tans geïmplementeer en sal tot 16:00 voortduur.

Die kragvoorsiener het geen nuwe inligting bekend gemaak oor watter fases oor watter tye oor die naweek toegepas sal word nie. Eskom het wel vroeër gesê ’n minimum van fase 4 sal oor die naweek ingestel moet word.

Die voortslepende staking, wat Eskom nou reeds dae lank lamlê, het hom genoop om weer fase 6 in te stel.

Eskom sal vandag amptelik sy jongste aanbod aan die vakbonde ter tafel lê. Numsa en NUM het berigte dat hulle reeds ʼn loonooreenkoms van die hand gewys het, as onsin afgemaak.

“Numsa en NUM sal Vrydag met Eskom by die sentrale bedingingsforum onderhandel oor die voorstel wat Eskom ter tafel gelê het. Enige berigte of bewerings in die media wat daarop dui dat ons ʼn aanbod by Eskom óf aanvaar óf verwerp het, is vals,” het die vakbonde in ʼn verklaring gesê.

Lede van Numsa en NUM staak al vir langer as ʼn week nadat loononderhandelings ʼn dooiepunt bereik het. Die betogings het voorvalle van intimidasie en die versperring van paaie na kragsentrales ingesluit.

Eskom het Dinsdag aangekondig die kragvoorsiener en vakbondleierskap het in beginsel saamgestem oor die pad vorentoe wat betref loononderhandelings en dat Numsa en NUM sy lede gemaan het om dadelik terug te keer werk toe.

Hoë vlakke van afwesigheid onder personeel en intimidasie van werkende werknemers by sommige van die kragstasies het egter voortgegaan wat sake bemoeilik het om roetine-onderhoud en ander bedryfsvereistes uit te voer.

Die kragvoorsiener was om dié rede nie daartoe in staat om sommige kragopwekkers in diens te stel nie en het gesê hy is dus verplig om ongekende stappe te doen om noodopwekkingskapasiteit te bewaar en die kragstelsel te beskerm.