(Foto: Drakenstein Farm Watch, Facebook)
Die vinnige optrede van brandbestryders het verhoed dat ʼn veldbrand wat op ʼn historiese wynplaas in die Paarl uitgebreek het, groot skade aanrig.
Die brand het Woensdag omstreeks 01:00 in die veld op die Libanon-wynplaas uitgebreek. Die oorsaak van die brand is nog onbekend, maar die plaaseienaar vermoed die brand is met opset gestig.
(Foto: Drakenstein Farm Watch, Facebook)
Volgens Daan van Leeuwen Boomkamp, algemene bevelvoerder van die Drakenstein Farm Watch (DFW) se brand‑ en reddingspan, het die brand vinnig in die veld versprei en aandag getrek met meter hoë vlamme wat die laaghangende wolkbasis oranje gekleur het. Mense kon dié verskynsel vir kilometers ver sien.
“Die DFW se brand- en reddingspan en ʼn private brandbestrydingsentiteit in die Paarl is om 01:14 van die brand in kennis gestel deur ʼn DFW-bevelvoerder in die Libanon-plaasgebied. Volgens die bevelvoerder was die brand buite beheer en verdere bystand was nodig,” sê Van Leeuwen Boomkamp.
-
- (Foto: Drakenstein Farm Watch, Facebook)
-
- (Foto: Drakenstein Farm Watch, Facebook)
“Die doel was om die kosbare wynwingerde van die brand te red en om te keer dat die vlamme verder in die veld en na buurplase versprei.”
Die DFW het drie 4 x 4-brandweerwaens en drie SUV-kruiserspanne ontplooi en brandbestrydingspanne op die grond het strategiese posisies ingeneem om die vuur te omsingel.
“Die brand is teen 03:15 ten volle onder beheer gebring en die brandbestrydingspanne kon huis toe gaan om die laaste paar uur se slaap vir die nag in te kry.
“ʼn Lieflike (en nodige) reënbui het toe uitgesak net toe die spanne vertrek.”
-
- (Foto: Drakenstein Farm Watch, Facebook)
-
- (Foto: Drakenstein Farm Watch, Facebook)
Van Leeuwen Boomkamp sê die veld waar die brand uitgebreek het, is heeltemal afgebrand en ʼn paar rye wingerde is in die brand beskadig.
“Gelukkig was daar nie wingerde in die veld waar die brand ontstaan het nie.”
Die opstal word as van historiese waarde beskou met die hoofhuis wat dateer van 1884. Twee ouer huise staan ook op die plaas, maar dit is onseker wanneer dié huise gebou is.
Darem baie brande by historiese geboue deesdae.
Dit werk SO. Nie altyd maar dikwels. As jou huis, gebou as n historiese gedenkwaardigheid verklaar is mag jy nie sonder toestemming veranderinge aanbring nie.
Onthou ons is nie noodwendig almal mal oor historiese geboue nie. Jy wil dalk iets anders op jou grond bou. So jy kry nie toestemming, maar iemand het n vuurhoutjie.
Dit is terorisme, hoe vinniger die weskaap kan afstig en sy eie republiek vorm hoe beter.
Stem saam met Harley. Die brande, die riool op die strande ook. Alles deel van lae intensiteit sabotasie om die Wes-Kaap te destabiliseer. Dit sal natuurlik vererger indien die Kaap onafhanklik word …