Foto’s: Omstanders plunder ná ‘bloedbad’-ongeluk op N2

Een van die voertuie se wrakke. Foto: Verskaf

Terwyl paramedici Saterdagmiddag in KwaZulu-Natal moes bontstaan om na 16 beseerdes van ʼn ernstige kettingbotsing om te sien, het omstanders glo van die voertuie se wrakke geplunder.

Garrith Jamieson, woordvoerder van Rescue Care Paramedics, het gesê paramedici is omstreeks 13:30 na die kettingbotsing op die N2-snelweg naby Chesterville in Durban ontbied.

“Die toneel was ʼn totale bloedbad. ʼn Voetganger is doodgery, waarna ʼn tweede botsing plaasgevind het. ʼn Vragmotor het in verskeie voertuie ingeploeg. Twee van die voertuie is teen ʼn steil wal afgedruk, waarna die vragmotor ook teen die wal afgetuimel het,” het Jamieson gesê.

Volgens Jamieson was ʼn totaal van 11 voertuie en die vragmotor in die kettingbotsing betrokke.

“Altesaam 16 mense het verskeie soorte beserings opgedoen en bystand moes ontbied word om te kom help. Terwyl nooddienspersoneel na die beseerdes omgesien het, het inwoners van ʼn nabygeleë nedersetting die voertuie gestroop en gesteel wat hulle kon.”

Slegs een baan van die besige snelweg was oop vir verkeer. Nadat al die beseerdes op die toneel gestabiliseer is, is hulle na verskeie hospitale in Durban geneem vir mediese behandeling.

Die presiese oorsaak van die botsing is onbekend en word deur owerhede ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Tiaan

Het die plunderaars geen respek vir ander nie? Dit sê alles…

Gerd Lourens

Gespuis!!!

Lynne

Only in Africa!

Barbaars

Dit is kommerwekkend wat in ons land aan gaan. Hoe kan mens so laag daal. Babare, voel niks vir niemand nie.

anon

Ek wonder of hulle darem die mense se valstande uitgelos het