Gerugte oor polisie wat kospakkies vat, is vals

Een van die plasings op Facebook (Foto: Verskaf)

Gerugte wat op sosiale media versprei is oor 200 kospakkies wat deur polisielede gekonfiskeer is toe ’n kerk in Pretoria-Noord dit by ’n blanke plakkerskamp wou uitdeel, is onwaar. Só het brig. Vishnu Naidoo, nasionale polisiewoordvoerder, dit bevestig.

Luidens talle plasings en boodskappe op Facebook en WhatsApp is beweer dat lidmate van die “Lewende Lig”-kerk 200 kospakkies by die Bonaccord-plakkerskamp digby Pretoria wou aflewer toe die polisie klaarblyklik die kospakkies by die ingang van die park gekonfiskeer het. Die kerk is glo daarna weggewys.

In dié plasings is te kwader trou beweer dat die betrokke polisielede glo gesê het dat “geen kos by die wit mense afgelaai sal word nie”.

“Kan ons asb bid dat God sal ingryp, sodat arm blankes ook gehelp kan word,” lui die plasing verder.

Dié plasings het soos ’n veldbrand op sosiale media versprei. By sommige van die boodskappe is foto’s van brandmaer kinders saam versprei. Dié foto’s is voorgehou as honger kinders wat in dié spesifieke plakkerskamp woon.

Maroela Media het die Lewende Lig-gemeente in Wonderboom-Suid asook die Ewige Lig-gemeente in Montana gekontak en nie een van die kerke dra kennis van die beweerde voorval nie.

Die plasing met die foto’s van brandmaer kinders (Foto: Verskaf)

Leon Cronje van die niewinsgewende organisasie Boere Gemeenskap Transvaal besoek die Bonaccord-plakkerskamp gereeld en het Maandag 80 kospakkies by die kamp gaan aflaai. Die Boere Gemeenskap Transvaal-organisasie help verskeie plakkerskampe reg oor Gauteng.

Volgens Cronje het die persoon in beheer van die kamp gesê hulle dra glad nie kennis van die voorval met die 200 kospakkies en polisie soos op sosiale media beweer word nie.

“Ons het ook van die voorval op sosiale media te hore gekom. Toe ons Maandag kos daar gaan afgee het, was daar geen polisie, soos beweer, eers in sig nie. Niemand by die kamp weet eers van hierdie voorval nie,” vertel Cronje.

Cronje het beaam dat die foto’s van die honger kinders wat saam met die boodskap oor die kospakkies versprei is, van die internet afgetrek is.

Naidoo sê ’n saak is by die Pretoria-Noord-polisiestasie oopgemaak na aanleiding van die voorgeskrewe afsonderingsregulasies wat die verspreiding van vals nuus oor Covid-19 verbied. Verspreiding van vals nuus kan tot ses maande tronkstraf of ’n swaar boete lei.

Naidoo sê die polisie is tans op die spoor van die persoon wat verantwoordelik is vir die verspreiding van dié vals nuus.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Lizanda

Hmmmm al hoe meer rooi ligte flikker …… sou ons dan kon aanvaar dat al hoe meer mense sit rond en dink storietjie uit oor polisie wangedrag en selfs diefstal soos op kringtelevisie vasgevang en gebeeldsend op TV, vra net?

Marieta

As dit n vals berig is, moet die skuldige party behoorlik aan die pen ry! Nie net is sulke onsin uiters ontstellend en kwaadstokend nie, maar dit stel alle ware nuusgewing oor vergrype en diskriminasie, bloot om as spekulasie of fopnuus afgemaak te word. Dit benadeel die geloofwaardigheid van ernstige oortredings en plaas net nog n stok in die hand van diegene wat alreeds magsdronk is.

Kerneels

Sulke vals gerugte is uiters onstellend.

Dit maak my woedend as mense emosioneel daarop reageer en wild en wakker versprei sonder om na te gaan of dit die waarheid is of nie. STOP!!! DINK!!! Maak seker dis waar voor jy die share knoppie druk!!! Wil jy regtig die satan help om leuens te versprei?

Hierdie tipe boodskappe lyk vir my na psychological warfare wat gemik is op sekere groepe. En ons val daarvoor. Hard. Mission accomplished.

Michael 1

Ek kan nie glo dat daar mense in hierdie tye is wat so onsensitief is om vals nuus van die aard te versprei nie ,julle sal gestraf word.

Fedup

Thank you for clearing this up for us mm. Now, as for that sick phsyco spreading this kind of stories. Please come and visit me. We have a lot to discuss. We have enough problems in this country as it is. No need to suck things out of your thumb to what end it is you are having.