Geweld vlam op tydens protes in Velddrif

Geweld vlam op in Velddrif weens betogings. (Fotos: Alida Buckle)

Skrywer: Alida Buckle 

Vensters van nuutgeboude, onbewoonde HOP-huise in die Noordhoek-woonbuurt van Velddrif is vanoggend stukkend gegooi, wasbakke uitgeruk en toiletsitplekke gebreek tydens ʼn onwettige betoging op dié Wes-Kaapse dorp.

Munisipale kantore en sakeondernemings was vandag gesluit uit vrees vir geweld.

Volgens kapt. Predon Ackeer, polisiehoof, het die betogers buitebande in die strate aan die brand gesteek. Hulle is ontevrede oor die uitkoms van ʼn vergadering op Sondag 13 Oktober met Ray van Rooyen, burgemeester van die Bergrivier-munisipaliteit, oor behuising. Van Rooyen is Sondag onder polisiebegeleiding uit die buurt verwyder. Hy sou vrae beantwoord wat verlede Woensdag tydens ʼn vreedsame optog aan hom oorhandig is.

Volgens Lea Adams, ʼn gemeenskapsleier, is daar ongelukkigheid oor mense wat na bewering HOP-huise moes kry en wat glo klaar vir die aansluiting van dienste betaal het, maar die sleutels is glo aan ander mense oorhandig. Van Rooyen het hierop gesê dat hy al by vorige geleenthede dié spesifieke sake met die gemeenskap probeer bespreek het.

Geweld vlam op in Velddrif weens betogings. (Fotos: Alida Buckle)

Volgens Ackeer het geweld Maandag om 04:00 weer opgevlam, met ʼn skare van byna 3 000 mense wat gedreig het om die Noordhoek-gemeenskapsaal af te brand. ʼn Groot groep polisiebeamptes van Laaiplek (Velddrif) en die Weskus-omgewing, asook munisipale wetstoepassingsbeamptes van Saldanhabaai, die Bergrivier en die Swartland het die skare by die gemeenskapsaal gekeer om verder die dorp in te vaar.

Daar is vir ure oor en weer beraadslaag om ʼn kompromie te probeer bereik. Die skare wou egter niks weet van ʼn vergadering op Dinsdag 15 Oktober nie en het opsluit antwoorde geëis.

Verskeie politieke partye het ook geëis dat die buurt se oortrokke water-en-ligte-skuld afgeskryf word, iets wat Van Rooyen verduidelik het nie oornag kan gebeur nie. “Ons kyk op die oomblik na die moontlike instel van verskillende kategorieë in dié verband.” Hy het uitgewys dat inwoners wat vir deernistoelae kwalifiseer én aansoek daarvoor doen, se skuld wel afgeskryf word.

Die skare het verdaag nadat afgespreek is dat Van Rooyen Maandag om 18:00 met ander amptenary sal vergader oor die kwessie.

Volgens Hanlie Linde, munisipale bestuurder, gaan munisipale amptenare eers die omvang van die skade aan die HOP-huise bepaal wanneer die gebied weer veilig is om te betree.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Johan

In kort. Hulle is kwaad omdat hulle nie gratis munisipale dienste en gratis huise kan kry nie. Nou vernietig hulle alles wat voorkom….
Pateties!

Bees

Waar kry hulle so vinnig 3000 vandaan om op te ruk? Ek moet ten duurste betaal vir my hophuis op Velddrif.

piper

met sulke mentaliteit is daar geen hoop vir ons land nie. wilalles verniet he sonder om self enige insette te lewer. ons beweeg stadig maar seker na n rewolusie war die hele land gaan vernietig. hier is geen toekoms nie.

AB

Los daai stukkende geboue net so. Laat hulle in daai krotte bly. Hulle hou mos daarvan as alles stukkend is. Hulle wil mos in die”twilight zone” bly!

Dries

O my aarde! Na di vensters gebreek en wasbakke uitgeruk is, val di sleutels vir di huise toe ni uit di lug ni…