Hommeltuie ‘red’ boere van indringerplante

Morné Jonker met die hommeltuig. (Foto: Cobus Meiring)

Boere in die Suid-Kaap gebruik gespesialiseerde hommeltuigtegnologie in ʼn poging om indringerplante en -bome op die Outeniekwaberge uit te wis.

“Die beskikbaarheid van hommeltuigtegnologie wat aangepas is vir die vervoer van onkruiddoder om oor die mees aangetaste gebiede te spuit, het ons gered,” sê Morné Jonker, ʼn boer in Kammanassie.

“Hommeltuigtegnologie is vir ons uiters bekostigbaar, gegewe die omvang van die probleem en dié dat indringerplante en -bome langs steil berghange en ontoeganklike riviergebiede is. Dit is ook uiters doeltreffend en akkuraat in die toepassing daarvan.”

Die nuwe saailinge wat begin groei het ná die 2018-Outeniekwa-veldbrandramp het boere die geleentheid gebied om die verspreiding van dié plante en bome finaal te bekamp.

“Ons beste kans om te voorkom dat hierdie bome volwassenheid bereik, is deur middel van ʼn geskikte onkruiddoder wat deur die hommeltuig versprei word,” sê Jonker.

Die hommeltuig in aksie. (Foto: Cobus Meiring)

“Vir die afgelope vier dekades sukkel die suidelike en noordelike hellings, asook die piek van die Outeniekwaberge met die aggressiewe verspreiding van indringerplante en -bome, veral wattel- en dennebome,” sê Cobus Meiring van die Suid-Kaapse Grondeienaarsinisiatief (SKG).

Dié plante en bome het ʼn direkte verwantskap met die afname in ondergrondse waterbronne en het reeds watergebruikers in Kammanassie- en Olifantsrivierstelsels nadelig beïnvloed. Riviersisteme in dorpe soos Oudtshoorn en Calitzdorp het óf heeltemal opgedroog óf onderpresteer.

Boere aan weerskante van die Outeniekwaberge werk nou saam met SKG in ʼn gesamentlike poging om streeksrivierstelsels te rehabiliteer om biodiversiteit te hervestig en te bewaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

4 Kommentare

Herpiet ·

Dit kan ook gebruik word om aanvallers tydig op te merk…

Piet ·

Ja Herpiet, daar is BAIE kameras (ook met nagvisie) op die mark beskikbaar.

Genis ·

Kan mens nie ander indringers ook bespuit nie…? Met gloei verf soos die wat bank note het nie?

Piet ·

Hi Genis, Die tegnologie laat ons toe om enigiets te spuit. As ons die regte middels kry vir die spesifieke indringers kan ons die spuitwerk kom doen. Die groot voordeel wat die hommeltuig bied is presiese hoeveelhede wat bespuit kan word (per hektaar en/of area.) Dit geld natuurlik ook vir enige gewasbespuiting.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.