Houe val glo ná polisieman hondjie doodry

Lyndon Smith se kneusplek aan sy gesig.

Lyndon Smith se kneusplek aan sy gesig. Foto: Verskaf

ʼn Rustige Saterdag-uitstappie het in ʼn traumatiese ervaring vir ʼn gesin van Villiers uitgedraai, nadat ʼn polisiebeampte, wat nie aan diens was nie, glo hul Basset-hondjie doodgery en dit tot ʼn onderonsie gelei het.

Ashleigh van der Merwe (24), ʼn dagsorgmoeder van dié Vrystaatse plaasdorpie, het Donderdag aan Maroela Media gesê sy en haar verloofde, Lyndon Smith (27), het op 23 Julie saam met ʼn vriendin en vier kinders, tussen twee en 10 jaar oud, met hul vier honde gaan stap.

“Ons het twee volwasse Jack Russels wat self gestap het, terwyl ons ons twee babahondjies, ʼn boerboelkruis en ʼn agt maande oue Basset, Droopy, in ons arms gedra het,” het Van der Merwe gesê.

Die groepie het in ʼn stadium verby ʼn winkel gestap en die Basset op die grond in die parkeerterrein neergesit, aangesien daar nie verkeer was nie.

“Droopy het tot op die teerpad gehardloop net toe iemand in ʼn wit bakkie om die draai gekom het. Hy het genoeg tyd gehad om te stop of uit te swaai, maar hy het aanhou ry en die hondjie voor die kinders doodgery. Daarna het hy stadig verder gery.”

Ashleigh van der Merwe se merk op haar wang. Foto: Verskaf

Ashleigh van der Merwe se merk op haar wang. Foto: Verskaf

ʼn Ontstelde Smith het die bestuurder gestop en gekonfronteer. Die man was in siviele drag en Smith het nie geweet hy is ʼn polisiebeampte nie. ʼn Woordewisseling het tussen Smith en die man ontstaan en die man het Smith glo van sy voete af gestamp. Smith het in reaksie die man geklap.

“Intussen het ʼn groep mense begin saamdrom en toe ons weer sien, het ʼn polisievangwa ook stilgehou. Die polisie het hom voor die kinders in die agterkant van die vangwa ingeboender en hom in hegtenis geneem vir aanranding.”

Van der Merwe verduidelik sy is daarvan weerhou om haar verloofde te sien en toe sy na die agterkant van die vangwa wou gaan om te kyk wat aangaan, het dieselfde man wat bakkie bestuur het, haar glo op haar wang geklap. Die klap het ʼn rooi merk op haar wang gelaat en haar kakebeen is uit lit. Smith is glo in die vangwa deur ʼn beampte in uniform vasgehou terwyl die bakkiebestuurder hom ook aangerand het. Smith het kneusplekke aan sy gesig en arm opgedoen.

Smith is tot Dinsdag by die Villiers-polisiestasie aangehou waarna hy in die dorp se landdroshof verskyn het. Hy is op waarskuwing vrygelaat en die saak is tot 11 Augustus uitgestel vir verdere ondersoek.

Van der Merwe het ʼn klag van aanranding teen die polisiebeampte ingedien. Smith wou die dag nadat hy vrygelaat is, ʼn klag teen die polisiebeampte ingedien het, maar polisiebeamptes het glo geweier om hom by te staan.

Smith het intussen, as gevolg van die voorval, sy werk as ʼn konstruksiewerker, waar hy skaars ʼn maand en ʼn half terug begin werk het, verloor.

Lt.kol. Thandi Mbambo, polisiewoordvoerder, het aan Maroela Media gesê die voorval is by die onafhanklike polisie-ondersoekdirektoraat (Opod) aangemeld vir verdere ondersoek.

Robbie Raburabu, waarnemende nasionale woordvoerder van Opod, het aan Maroela Media gesê die saak was nog nie teen Donderdag onder hulle aandag gebring nie, maar die moontlikheid bestaan dat dit nog gedoen kan word. Hy het onderneem om navraag te doen oor die voorval. Hy het die paartjie ook aangeraai om die voorval amptelik by Opod aan te meld. Van der Merwe het aan Maroela Media gesê hulle sal dit doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

75 Kommentare

jongste oudste gewildste
Blou bende

Die polisie is vreeslik uitgeslape veral in die moot as en wanneer jy ‘n klag lê teen ‘n polisieman ondersoek opod dit kastig maar word terugverwys na die stasie waar dit onder die mat ingevee word hou die saak dop daar sal niks van kom nie asb maroela media doen ‘n opvolg na ‘n paar weke asb

dea

Moenie jou hond in ‘n parkeer terrein laat loop nie – dit is ‘n plek vir motors.
Loop met die honde in ‘n tuin of wandelpad. Hoop julle het julle les geleer.

RC

Kontak Afriforum en hoor of hulle hier kan help.

Blou bende

Skuus verkeerd gelees groot verskoning

Jan maak n plan

Kap die polisieman met n siviele eis op hom as persoon.