Jong motorfietsryer sterf in tref-en-trap

(Argieffoto: ER24)

ʼn Jong motorfietsryer is Vrydag in ʼn vermeende tref-en-trap-botsing in Ladysmith in KwaZulu-Natal dood.

Volgens Russel Meiring, woordvoerder van ER24-nooddienste, het paramedici omstreeks 16:32 op die toneel in Newcastleweg aangekom.

“Die 23-jarige man en sy motorfiets is in die middel van die pad aangetref. Paramedici het hom ondersoek en bevind dat hy verskeie beserings opgedoen het. Daar was niks wat vir hom gedoen kon word nie en hy is op die toneel dood verklaar.”

Meiring het gesê die bestuurder van die voertuig wat teen die motorfiets gebots het, het glo na die botsing van die toneel gevlug.

Die presiese omstandighede rakende die voorval word ondersoek.