Jong pa voor gesin aangerand ná botsing met koedoe

Kneusplekke aan Frans Kleynhans se bolyf. Foto: Verskaf

Kneusplekke aan Frans Kleynhans se bolyf. Foto: Verskaf

ʼn Jong man van die plaasdorpie Derby in Noordwes is erg getraumatiseerd nadat ʼn botsing in ʼn twee uur lange nagmerrie ontaard het en hy ten aanskoue van sy pa, swanger vrou en tweejarige dogtertjie aangerand is.

Frans Kleynhans (29), ʼn bestuurder van ʼn kettingwinkel in Rustenburg, het aan Maroela Media gesê hy pendel gereeld met sy Hyundai Tibia op die R30 tussen Derby en Rustenburg.

“Ek was verlede Woensdag omstreeks 21:50 op die R30 op pad na ʼn vulstasie. Ek het om ʼn draai gegaan toe daar skielik ʼn koedoe voor my ingespring het. Ek het die bok getref, beheer oor my voertuig verloor en in die aankomende verkeer ingery,” het Kleynhans gesê.

Hy het gesê hy het ʼn Mercedes Sprinter-minibustaxi, met Oos-Kaap-nommerplate, teen die kant getref. Kleynhans se motor is erg beskadig en hy kon nie verder ry nie. Dit taxi het sowat 100 m van die ongelukstoneel tot stilstand gekom met skade aan die kant van die voertuig en die linker agterwiel wat pap was.

Frans se skraapwonde. Foto: Verskaf

Frans se skraapwonde. Foto: Verskaf

“Ek het geen beserings opgedoen nie en uit my motor geklim. Ek het na die taxibestuurder geroep om te hoor of almal oukei is. Daar was ook niemand met beserings nie.”

Die koedoe het ná die trefslag in die veld in verdwyn, maar hare van die dier was duidelik sigbaar waar die motor dit getref het.

Kleynhans het gesê daar is nie goeie selfoonopvangs in die gebied waar die ongeluk plaasgevind het nie en dat hy ná ʼn groot gesukkel uiteindelik die polisie kon bel. “Die polisie het gesê hulle kom nie uit na ongelukstonele waar niemand ernstig beseer of dood is nie en dat ons self na die naaste polisiestasie [in Rustenburg] moet gaan om die ongeluk aan te meld.”

Aangesien sy motor nie in ʼn werkende toestand was nie, het hy sy pa probeer ontbied. Hy het naderhand op sy motor se dak gestaan om sein te kry om sy pa te bel.

Intussen het die taxibestuurder glo aangedring om dadelik betaal te word vir die skade aan die taxi. Kleynhans was erg geskok en het probeer verduidelik dat hy nie dadelik die geld sal kan gee nie. Intussen het van die insittendes aangesluit en die situasie het gespanne geraak.

“ʼn Swart motoris het verby gery en gesien wat aangaan en het tevergeefs probeer om die situasie te kalmeer. Die taxibestuurder het my begin rondruk. Ek was in ʼn stadium deur sowat 15 mense omsingel, waarvan vier my vasgehou het.”

Toe sy pa daar aankom het dinge handuit ruk toe hy probeer ingryp het. “My swanger vrou en tweejarige dogtertjie het in my pa se bakkie gesit en dit magteloos aanskou. Ek is voor hulle aangerand, rondgepluk en gewurg toe ek om hulp probeer roep het. Ek kon in ʼn stadium nie asem kry nie. My pa wou my red, waarna hulle hom op die grond gegooi en geslaan het om hom te verhoed om by my uit te kom.”

ʼn Ander taxi van dieselfde taxivereniging het intussen by die toneel stilgehou en iemand het begin om die taxi wat in die botsing was se band te vervang.

“Hulle het my op die teer gesleep en in die taxi ingeboender en my as gyselaar aangehou. Daar het hulle vir my gesê hulle soek al lankal ʼn wit boer se kop. Hulle gaan my saamvat, doodmaak en langs die pad uitgooi. My lewe het voor my oë verbygeflits en ek het gedink ek gaan nooit weer my gesin sien nie.”

Kleynhans se pa het met die groep probeer onderhandel dat hulle hom moet vrylaat. Die taxibestuurder het aan sy pa gesê hy gaan Kleynhans self na die polisiestasie op Derby neem, maar daar is egter nie ʼn polisiestasie nie. Kleynhans is vas oortuig hulle wou hom dalk beroof en vermoor. “Ek het self in my toestand ook met die drywer probeer praat, maar al wat hy vir my gesê het, is ‘today I’m gonna kill you’.”

Die polisie het uiteindelik net ná middernag by die toneel opgedaag nadat iemand hulle weer ontbied het, waarna die situasie onder beheer gebring en Kleynhans vrygelaat is.

“As die polisie vyf minute later daar opgedaag het, was hulle met my weg gewees en het hulle my dalk langs die pad doodgemaak.”

Kleynhans en sy pa is direk daarna na die Rustenburg-polisiestasie om die ongeluk aan te meld. Hulle het later die dag aanklagte van aanranding met die doel om ernstig te beseer, poging tot ontvoering en intimidasie teen die taxibestuurder aanhangig gemaak.

Lt.kol. Pelonomi Makau, provinsiale polisiewoordvoerder, het Dinsdag aan Maroela Media bevestig dat die aanklagte aanhangig gemaak is en ondersoek word.

Niemand is nog in verband met die voorval in hegtenis geneem nie.

Kleynhans het gesê hy en sy pa het inwendige beserings, kneusplekke en skraapwonde opgedoen, maar dat hulle nie verdere mediese behandeling nodig gehad nie. Al vier van hulle moet egter berading ontvang om die trauma te verwerk.

“Ek is regtig nou te bang om daai pad te ry. Die betrokke taxibestuurder het op ʼn manier my selfoonnommer in die hande gekry en bel my aanhoudend om te hoor wanneer hy sy geld kry. Ek het hom naderhand na my prokureur verwys en sy nommer geblok,” het hy gesê.

“Ek gun wat ek moes deurmaak vir geen mens nie, dit grens aan ʼn plaasaanval. Al verskil is, ek het oorleef en ek kan weer by my gesin wees.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

77 Kommentare

jongste oudste gewildste
Anel

Hulle slaan in hul hordes toe. Maak net soos hulle wil. Maak dreigemente net soos hulle wil. As dit nou anders om was eas die arme man in die tronk en sy kop is op ‘n skinkbord geeis. Waar gaan ons heen?

Jorrie

Hier gaan nie ‘n haan na kraai nie, maar as dit nou ‘n swart bestuurder was wat deur wit mense aangerand was, het ons weer nie die einde daarvan gehoor nie

Asjas

Wat wet ek jou daardie Taxi het nie versekering nie?? Verder vreet ek nog my hoed op as hy geldige lesensie het en dat die nommer plaat nie vervals is nie.
As jou sake reg is, sorteer die versekering dit onder mekaar uit, niks se gebetaal sommer daar langs die pad nie!!

Hugo

Hoeveel meer moet ons vat? Ek is nie eers meer geskok as ek nuus lees nie. Jammer vir die gesin wat hierdie padjie moes stap. Dis moeilike tye waarin ons leef – wonder net wanneer gaan ons opstaan en sê genoeg is genoeg?

Mike

Ja en vergelyk dit nou met die doodskis geval. Hierdie is tien maal erger en niemand is nog eers in hegtenis geneem nie. Dit gaan lekker in de land van melk en heuning.