Juan Boucher in Namibië aangehou ná permit-flater

Juan Boucher. (Foto: Maroela Media)

Die lang arm van die gereg het die afgelope naweek die sanger en liedjieskrywer Juan Boucher ‘n dwarsklap gegee toe hy in Namibië in hegtenis geneem is as gevolg van foutiewe reisdokumente.

Boucher, sy vrou, Shamodene, en sy kitaarspeler, Rudi Kleingeld, is Saterdag te midde van ‘n vertoning in Walvisbaai deur immigrasiebeamptes aangekeer.

Shamodene is reeds Saterdag vrygelaat, aangesien sy en Boucher ‘n ses maande oue baba by die huis het. Boucher en Kleingeld is egter eers Dinsdag vrygelaat uit die aanhoudingselle waar hulle sedert Saterdagaand aangehou is.

Nadat hulle Woensdagoggend in die hof in Walvisbaai verskyn het, het hulle die eerste beskikbare vlug na die OR Tambo-lughawe in Johannesburg gehaal.

Boucher vertel aan Maroela Media hy het die naweek twee optredes in Namibië gehad. Hy het Vrydagaand voor ‘n gehoor van duisende mense opgetree tydens die Outjo-wildsfees in Outjo.

“Dit was ongelooflik lekker. Ek het baie Namibiese aanhangers en is met ope arms ontvang,” sê Boucher.

Daarna is hy en sy geselskap na Walvisbaai, waar hy die Saterdagaand opgetree het.

Hier het ‘n immigrasiebeampte vir Shamodene, wat in die gehoor gesit het, genader en gevra vir hulle reisdokumentasie.

Boucher en Kleingeld was op die verhoog en salig onbewus van wat aangaan. Dié twee musikante is eers later deur Shamodene ingelig dat hulle in die moeilikheid is.

‘n Administrasiefout het tussen die onderskeie agente in Suid-Afrika en Namibië, wat Boucher se vertonings bespreek het, ingeglip. Die werkspermit wat hy en Kleingeld bekom het, het slegs die Vrydagaand se vertoning in Outjo aangedui, met geen aanduiding van die vertoning in Walvisbaai nie.

“Ons het dadelik besef dat die beamptes glad nie gelukkig was met ons nie, maar hulle het ons nie sleg behandel nie.Toe hulle vir ons verduidelik wat die probleem is met ons werkspermitte, was ons uit die veld geslaan,” vertel Boucher.

“Ons het geen idee gehad dat daar fout was met ons reisdokumente nie. Ons as kunstenaars het administratiewe persone wat ons help met dié soort dokumente, en ons het aangeneem alles is reg.”

Boucher benadruk dat die beamptes bloot hulle pligte nagekom het. “Ons het Namibië se reëls oortree, al was ons nie aanvanklik bewus daarvan nie. Die feit van die saak is dat hulle nie administratiewe foute aanvaar nie.”

Shamodene het ‘n Namibiese prokureur genader om hulle by te staan. “Daar is mooi na ons omgesien in die aanhoudingselle. Dit was die eerste keer in my lewe dat ek in so ‘n situasie was,” sê Boucher.

Hy en Kleingeld is Dinsdag op borgtog vrygelaat en moes ‘n boete van N$3 000 (sowat R3 200) betaal nadat hulle skuldig gepleit het op die oortreding.

Boucher wil sy kollegas in die Suid-Afrikaanse vermaakbedryf bewus maak daarvan dat hulle self ook moet seker maak hulle reisdokumente is volledig en korrek voordat hulle na die buiteland reis.

“Dis uiters belangrik dat jy elke plek waar jy gaan werk, spesifiseer. Jou visum en werkspermit moet daarmee ooreenstem. Wanneer daar vrae gevra word, maak seker dat jy die regte antwoorde het. Die kleinste fout kan jou in groot moeilikheid laat beland. Dit het my ‘n paar rand gekos om weer vry te wees, en ek is dankbaar om terug te wees in Suid-Afrika by my vrou en dogtertjie.”

Hy sê hy het baie uit dié ondervinding geleer. “Ek en Rudi het mooi na mekaar gekyk en mekaar bygestaan. Ons prokureur het ons deurgaans moed ingepraat en wonderlik ondersteun; so ook Shamodene en ons vriende in Swakopmund, wat vir ons blyplek verskaf het totdat ons kon terugkom Suid-Afrika toe. Daar was ‘n hele paar mense wat ons onwrikbaar bygestaan het, en ons sê uit ons harte dankie daarvoor – julle weet wie julle is.”

Volgens Boucher het niemand kanse probeer vat nie. “Ons doen altyd alles op die regte manier en volg die prosedures soos ons moet. Ons almal het ‘n les geleer en deur ‘n vreesaanjaende tyd gegaan. Ek het baie respek vir Namibië en glo nog steeds dit is die mooiste land op die Afrika-vasteland.”

Intussen het die splinternuwe musiekvideo vir Boucher se liedjie getiteld “Vreemdeling” Woensdag vir die eerste keer die lig gesien.

“Ek het ook nou die video vir die eerste keer gesien nadat ek tuisgekom het,” vertel hy, en sê “Vreemdeling” is ‘n gepaste liedjie vir die situasie waarin hy homself die afgelope paar dae bevind het.

“Die liedjie gaan juis oor hoe vinnig iets van jou weggevat kan word as jy nie dinge volgens die boek doen nie.”