Kaapstad staal hom vir matriekmakieties

Kaapstad (Foto: Jannie Hamilton)

Met die meeste matrikulante wat vandeesweek hul eindeksamen voltooi, moedig die Stad Kaapstad hulle aan om dié mylpaal verantwoordelik te vier.

In die verlede was daar al gevalle waar matrikulante se feesviering heeltemal handuit geruk het en die stad wil soortgelyke voorvalle voorkom.

“Die laaste ding wat iemand wil hê, is dat só ʼn vreugdevolle geleentheid ontsier word deur voorvalle van geweld, beserings of sterftes wat verband hou met drankmisbruik. Ons wil ook nie hê een van die matrikulante moet met ʼn misdaadrekord sit nie. Ons personeel sal die verrigtinge fyn dophou en optree as enige oortredings waargeneem word,” sê JP Smith, burgemeesterskomiteelid vir veiligheid en sekuriteit.

Volgens Smith sal die stad se wetstoepassingsagentskappe meer sigbaar rondom die strandgebiede en in die middestad – veral Langstraat – wees.

Smith herinner die matrikulante daaraan dat drankgebruik in openbare ruimtes verbied word ingevolge die stad se bepalings.

“Enigiemand wat alkohol in openbare ruimtes gebruik, sal ʼn boete van R500 opgelê word en daar sal op die alkohol beslag gelê word.”

Smith vra dat verantwoordelike bestuurders ook aangewys word om die gevaar van dronkbestuur te verhoed.

“Die rampbestuurregulasies sal ook afgedwing word. In die afgelope weke het die stad se wetstoepassingsagentskappe ʼn toename gesien in die getal mense wat beboet word omdat hulle nie maskers dra nie, of die aandklokreël verontagsaam.”

Smith doen ook ʼn beroep op ouers om ten alle tye te weet waar hul kinders is en dat hulle veilig is.

“Maak seker jou kind se foon het genoeg lugtyd om te kan bel indien daar ʼn noodgeval is.”