Klein Daniel tuis, ‘Dankie Jesus’

Daniel Kerswell (2) is Dinsdag uit die hospitaal ontslaan. (Foto: Facebook)

Daniel Kerswell (2), die peuter wat op 7 September agter ʼn motorwiel by sy ouerhuis in Ermelo, Mpumalanga, beland het, is Dinsdag uit die Steve Biko Akademiese Hospitaal in Pretoria ontslaan.

Sy ma, Danelle, het dié goeie nuus op Facebook gedeel met foto’s van ʼn glimlaggende Daniel wie se armpie nog in ʼn blou hangverband is.

“Hallelujah, dankie Jesus dat U ons seuntjie vir ons gespaar het,” het sy geskryf.

Volgens Kerswell is Daniel in dié stadium nog baie swak en loop hy moeilik.

“Hy mag vir klein rukkies alleen loop, maar glad nie sonder toesig nie.”

Kerswell sê Daniel het ook die eerste aand uit die hospitaal onrustig geslaap en kort-kort gehuil.

Nietemin is die gesin uiters dankbaar dat hul seuntjie tuis is.

Sy pa, Paul, het hom ook met sy gunstelingwegneemhappies van KFC bederf asook ʼn lekker roomys.

Daniel Kerswell (2) is Dinsdag uit die hospitaal ontslaan. (Foto: Facebook)

“Hy het sommer self die lepel gevat en geëet.”

Kerswell sê Daniel het ook lekker in die bad gespeel.

Maroela Media het vroeër berig dat Daniel beseer is toe hy agter die wiel van sy pa se motor beland het.

Medici het vasgestel dat hy sy regtersleutelbeen en ʼn been in sy linkerheup gebreek het. Sy longe is ook beskadig en hy het ʼn sny onder sy maag opgedoen. Hoewel sy gesig ná die voorval blou en gekneus was, het hy geen breinskade opgedoen nie.

Kerswell het die dokters en hospitaalpersoneel bedank wat die afgelope twee weke na Daniel omgesien het, asook hul geliefdes en die gemeenskap wat die gesin bygestaan het.