Kyk: SA vrou breek langafstandrekord 

Toni McCann by die eindstreep. (Foto: Simon Dugue)

ʼn Langafstandatleet van Kaapstad het die eerste Suid-Afrikaanse vrou geword om een van die uitmergelendste internasionale wedlope te wen.

Toni McCann het verlede Donderdag eerste oor die wenstreep van die Ultra Trail Mont Blanc OCC gehardloop. Sy het honderde ander deelnemers van reg oor die wêreld uitgestof om dié titel te verower. Volgens die wedloop se webwerf word die 55 km‑marathon in die Alpe in Frankryk gehardloop en deelnemers klim nagenoeg 3,5 km tydens die wedloop.

Deelnemers het 14,5 uur om die roete af te lê, meer tyd as wat vir die Comrades-marathon gegun word, maar McCann het dit in net 5 uur en 28 minute voltooi. Dit is boonop ʼn nuwe rekord.

In ʼn plasing op die Otter African Trail Run, ʼn hardloopklub waarvan McCann deel is, se Facebookblad, sê hulle dit was nog altyd haar droom om die wedloop te wen. “Jy het Suid-Afrika vandag trots gemaak. Ons salueer jou en kan nie wag dat jy binne die volgende maand weer aan ʼn wedloop op eie bodem deelneem nie,” skryf die klub.

St. Mary’s DSG Kloof, McCann se alma mater, het haar op Facebook gelukgewens met die oorwinning. “Geluk met ʼn hoogtepunt in jou loopbaan en ʼn fantastiese wedloop. Wat ʼn ongelooflike prestasie.”

Volgens die webwerf Faces Africa, het McCann die wedloop vir die eerste keer in 2021 aangepak, en 14de geëindig. In 2022 het sy, as deel van Adidas se Terrex-span, ʼn vyfde plek losgehardloop. McCann het aan die webwerf gesê sy was op haar senuwees toe die groot dag uiteindelik aanbreek, maar dat sy meestal opgewonde was om te begin hardloop.