‘n Snuffelhond wys die gedeelte van die rivier uit waar daar tydens die soektog gefokus kon word. (Foto: IPSS Medical Rescue)
Die soektog na twee jong KwaZulu-Natalse seuns wat Donderdag van stapel gestuur is, het tragies geëindig.
Andile Ngema (11) en Sibongokuhle Msami (12) het Donderdag saam met maats in die Umdlotirivier gaan visvang, toe hulle besluit het om te gaan swem, lui ʼn verklaring van Reaction Unit SA (Rusa).
“Albei het in die moeilikheid beland en het onder die water verdwyn. ʼn Poging om die liggame gister te herwin moes egter weens swak lig opgeskort word.”
ʼn Grootskaalse soektog deur lede van IPSS se soek-en-reddingseenheid, lede van die metropolisie, die polisie, die honde-eenheid en Rusa is vanoggend hervat.
“Die Rusa-R44-helikopter is gebruik om die dik hiasinte stroomaf te skuif van waar die seuns vermis geraak het,” sê Samantha Meyrick, woordvoerder van IPSS Medical Rescue.
Die Rusa-R44-helikopter is gebruik om die dik hiasinte stroomaf te skuif. (Foto: IPSS Medical Rescue)
Met die hulp van snuffelhond Dante, wat ʼn spesifieke soekgebied uitgewys het, is ʼn duikoperasie geloods en die liggame van die twee seuns is herwin, sê sy.
Die kinders se liggame is slegs enkele meter van mekaar aangetref.
“Die liggame is aan die Verulam-polisie oorhandig wat die voorval verder sal ondersoek,” sê Meyrick.
Sy het almal betrokke by die soektog geloof vir hul “fantasiese” spanwerk en hulp om te verseker die kinders se familie kry afsluiting.
Hartseer.
Hartseer, maar sonder die soek en reddingshond, Dante, en sy hanteerder, sou hulle ook nie so gou gekry gewees het nie. Goeie werk almal betrokke.
Baie hartseer dat ons kinders so verniel word, maar die Skepper van Hemel en Aarde slaap nie. Vergelding sal kom.