Ma, kinders baklei verwoed teen plaasaanvallers

Charne Pedersen-Horn en haar kinders (Foto: Verskaf)

’n Ma en haar drie kinders het dapper terugbaklei toe drie mans hulle Saterdag op hul plaas in Gonubie in Oos-Londen oorval het.

Charne Pedersen-Horn (39) vertel sy wou die middag omstreeks 14:00 haar drie kinders, ’n tweelingseun en -dogter (8) en tienjarige dogter, neem om roomys te gaan koop. Haar 14-jarige seun het die dag by sy biologiese pa gekuier en haar man, Mike Pedersen-Horn, het die middag fietsgery.

“Terwyl ek geskarrel het om die kinders buitekant bymekaar te kry om in die kar te klim, het ek ons erf se elektriese hek oopgedruk. Ek het in die verte drie mans gesien wat na ons toe aangeloop kom,” vertel Pedersen-Horn.

“Ek het aanvanklik gedink dit is een van ons plaaswerkers wat saam met klante is wat wil kool koop. Ons kry gereeld sulke klante. Toe hulle naderkom, het ek egter gesien dat dit nie een van ons plaaswerkers is nie. Hulle het in die erf ingeloop en ons oorval.”

Volgens Pedersen-Horn was een van die mans met ’n vuurwapen gewapen, terwyl die ander twee messe by hulle gehad het.

“Hulle het my geslaan, rondgestamp en my geskop dat ek op die grond val. Een van die mans wou my met die mes steek, maar my seuntjie het op sy rug gespring om hom te keer.”

Pedersen-Horn vertel die mans het hulle daarna in die huis probeer dwing.

“Ons het verbete daarteen baklei, want ek het geweet as ons eers in die huis is, sal ons dalk nie kan uitkom nie.

Mike en Charne Pedersen-Horn (Foto: Verskaf)

“My tienjarige dogter het die een man só hard gestamp dat hy byna sy balans verloor het.”

Pedersen-Horn het vir die mans gesê daar is ’n kluis vol geld in die kantoor. Die kantoor is buitekant in die motorhuis geleë. Een van die mans is saam met haar in die kantoor in, terwyl ’n ander een in die huis gegaan het. Die derde man het buitekant gestaan en “toesig” hou. Hy het af en toe ’n draai in die kantoor gemaak.

“Hy het my met sy vuurwapen in die gesig geslaan.”

Voor hulle by die kantoor ingegaan het, het Pedersen-Horn vir die tweeling gesê om te hardloop en haar skoonouers – wat ’n paar meter van die plaashuis bly – te roep. Haar ander dogter het by haar gebly.

Hulle was vir ’n hele ruk lank in die kantoor.

“Terwyl ons in die kantoor was, het ek onthou daar is ’n tweede deur na buite. Die man het by die ander deur gestaan toe ek en my dogter vinnig by die tweede deur uitgeglip het. Ons het na my skoonouers se huis gehardloop.”

Die mans het daarna in Pedersen-Horn se wit Prado van die plaas gevlug.

Op pad na haar skoonouers se huis het Pedersen-Horn die plaasbestuurder, Ninky Dyaphi, langs die pad gekry. Hy het ten tyde van die aanval fietsgery.

Dyaphi het in sy motor gespring en die mans probeer agternasit. Hy het die Prado sowat 3 km daarvandaan verlate op die grondpad gevind. Die mans het vermoedelik deur die bosse na ’n nabygeleë nedersetting gevlug.

Die verdagtes is nog nie vasgetrek nie.

Skootrekenaars, selfone en Pedersen-Horn se handsak is gesteel.

Pedersen-Horn sê sy is dankbaar dat sy en haar kinders met slegs ’n paar skrape weggestap het.

“Dit kon soveel erger uitgedraai het. In daardie oomblik toe die mans ons oorval het, het dit so onwerklik gevoel.

“My kinders was baie dapper en het koelkop gebly. Hulle sê hulle besef nou dat Jesus werklik bestaan, want Hy het ons daardie dag gehelp.”

Pedersen-Horn sê sy en die kinders is erg getraumatiseerd en ontvang tans berading.

Sy sê dit is die heel eerste keer dat só iets met hulle gebeur. Haar man woon al 43 jaar op die plaas.

“’n Mens dink só iets sal nooit met jou gebeur nie.”