Marno ontslaan; MRI nie meer nodig

Klein Marno Muller (5) het Woensdag met ballonne in die hand self uit die Netcare Garden City-hospitaal in Johannesburg geloop nadat hy ontslaan is. Die dokters beskou die feit dat hy geen breinskade opgedoen het nie as ’n wonderwerk. Hy het boonop genoegsaam herstel dat ʼn breinskandering nie meer nodig is nie.

Marno het vinnige vordering gemaak nadat hy Maandag uit die intensiewesorgeenheid na ’n algemene saal oorgeplaas is. Hy was drie weke lank in ’n geïnduseerde koma en is verlede Sondag uit sy koma gebring.

Marno is op 26 Mei in ’n ernstige toestand in die hospitaal opgeneem nadat hy op ʼn glyplank by sy kleuterskool in Brakpan aan die toutjies van sy baadjie gewurg het.

Die kleuter se ma, Helga Muller, skryf op Facebook dat hy ná 29 dae van bid, trane, geloof en hoop uiteindelik ontslaan is.

“Klein mensie, maar ’n groot wonderwerk van God. ’n Geneesde getuie van God. Waar Marno twee keer amper weg was, het God besluit: Nee, Hy het nog ʼn groot pad vir Marno,” skryf Helga.

Volgens Nadia Minnie, Marno se tannie, sou Marno vandeesweek nog ’n MRI-skandering ondergaan het, maar die dokters het dit nie meer nodig gevind nie.

“Die dokters wou nie vir klein Marno wéér onder verdowing plaas om die MRI te doen nie. Hulle is bang om weer pype in sy keel te druk, dat dit skade gaan aanrig. Deur middel van evaluasies en ondersoeke was hulle tevrede met sy toestand en het besluit om nie die MRI te doen nie,” vertel Minnie.

Volgens Minnie eet Marno al sagte kossoorte. Harde kos maak nog sy keel seer.

Hoewel daar aanvanklik aanbeveel is dat Marno ná sy ontslag na ’n rehabilitasiesentrum gestuur moet word, gaan hy nou terapie buite die hospitaal ontvang. Die kleuter moet basies alles weer van voor af leer doen.

“Marno moet nou twee keer per week fisio-, spraak- en arbeidsterapie kry.”

Minnie sê die familie is baie dankbaar dat Marno weer by die huis kan wees, en gaan dinge nou dag vir dag vat.

Verskeie geldinsamelingsprojekte is vir Marno begin om die familie met die hospitaaluitgawes te help. Klik hier vir meer inligting oor die geldinsamelingsprojekte.